تامر حسني: بساعد الشباب علشان ميعانوش زيي.. وفيلم بحبك عمل أعلى إيرادات في التاريخ
أعرب الفنان تامر حسني، عن سعادته بنجاح حفله أمس في الرياض بالمملكة العربية السعودية، بجانب حديثه عن تقديمه للمواهب الشابة، وتعاونه مع هيئة الترفيه بالمملكة خلال أفلامه.
وقال تامر حسني، على هامش مؤتمر حفله بالرياض: حفلة عظيمة وراقية وكالعادة كل ما باجي الرياض بقول دي أحلى حفلة وبلاقي اللي بعدها أحلى، الجمهور كل مرة بيفاجئني حفاوة أكتر وعدد أكتر الحمد لله.
تامر حسني: بساعد الشباب علشان ميعانوش زيي
وعن حرصه على تقديم المواهب الشابة، علق تامر حسني: وأنا من يوم ما طلعت وأنا معايا شعراء وملحنين وموزعين جداد وكل سنة ببقى ممصمم أني أقدم معايا 3 أو 4 جداد، أنا مبيعديش سنة غير لما أقدم ناس جديد، وأنا بستمتع بـ ده، لأن وأنا بطلع كان نفسي حد يحس بيا ويطلعني وعانيت كتير لغاية ما قابلت سلمى الشماع ونصر محروس اللي اكتشفوني، فأنا على قد ما أقدر بساعد الشباب علشان ميشوفوش المعاناة اللي شفتها.
تامر حسني: الناس قالت فيلم بحبك مش هينجح.. وبقول للشباب مفيش مستحيل
وأضاف تامر حسني: التأليف والغناء والتلحين والإخراج بيحتاج مجهود كبير، ولكني من صغري بدور على الاختلاف وبقول مفيش مستحيل، أنا كتبت فيلم بحبك وأخرجته وعملت موسيقاه التصويرية وكل الناس قالت مستحيل ينجح ومحدش بيعمل كل ده وينجح، ولكن الفيلم نجح الحمد لله وعمل أعلى إيرادات في التاريخ، فأنا بتشرف بعمل زي ده وعايز أقول للشباب إن مفيش مستحيل.
أما عن التعاون المصري السعودي في الأعمال الفنية، فعلق تامر حسني: أتشرف بالتعاون السعودي وإحنا عملنا فيلم مش أنا، وهيئة الترفيه بالسعودية ساعدتنا فيه لأنه كان أول فيلم مصري يتصور في السعودية، وفيلم البدلة كان أول فيلم مصري يتذاع في سينمات السعودية، وهما على طول داعمين.
