نشوى مصطفى ترثي زوجها: 33 سنة مبعدناش عن بعض.. وشيلتني في مرضي وطبطبت عليّا
حرصت الفنانة نشوى مصطفى على نعي زوجها الراحل محمد عماد بكلمات مؤثرة، معبرة عن فقدانها الشديد له، وعدم قدرتها على تحمل رحيله، حيث علمها الصبر وساندها في الأزمات الصحية التي مرت بها مؤخرًا، على حسب قولها.
وكتبت نشوى مصطفى منشورًا عبر حسابها الشخصي بموقع فيسبوك جاء فيه: سترتني ربنا يسترك، أكرمتني ربنا يكرمك، سيبت لي أجمل هدية ولادنا ربنا يهاديك بالفردوس الأعلى، 33 سنة ستر وكرم ومحبة ومودة ورحمة، علمتني ازاي أكون من المتصدقين، علمتني ازاي أكون دايمًا في معية الله، علمتني ازاي تكون عزة النفس.
نشوى مصطفى ترثي زوجها بكلمات مؤثرة
وأضافت نشوى مصطفى: علمتني ازاي أتسامح حتى مع اللي أذاني، علمتني ازاي أتوكل على الله في كل شؤوني، علمتني ازاي أكرم ضيفي، علمتني معنى التواضع مع عباد الله الضعفاء، يا نبيل الأخلاق يا ابن الأصل العالي، نسيت تعلمني ازاي أقدر أعيش من غير وجودك، 33 سنة مبعدناش عن بعض لحظة، 33 سنة ذكريات وحياة بحلوها ومرها، 33 سنة كنت خير زوج وخير أب، أكرمتني وسترتني وجبرت خاطري وربيت عيالنا أحسن تربية.
واختتمت نشوى مصطفى حديثها قائلة: ليه يا عماد سيبتني لوحدي كده، ما استاهلش منك تسيبني لوحدي ده أنا ما بعرفش أعمل حاجة في الدنيا، أنت اللي كنت بتعمل لنا كل حاجة، أنت اللي سندتني في كل ظروف حياتي الصعبة، في شدتي وفي مرضي شيلتني وطبطبت عليا، يا على غلاوتك يا عشرة عمري، يا أبويا وأخويا وحبيبي وجوزي وابني، بموت يا عماد، بموت وأنت مش قدام عيني، هكمل ازاي يا رب من غيره، ادعوا له بالرحمة وادعوا لي بالصبر.
