أحمد العوضي يرد على انتقادات تكرار شخصياته: بقالي 4 سنين باخد أفضل ممثل.. ونفسي أكسب 10 آلاف بني آدم
رد الفنان أحمد العوضي على الانتقادات التي طالته بشأن تكرار شخصياته في أعماله الدرامية، واصفًا تلك الانتقادات بأنها مجرد آراء شخصية لا تعبر عن رأي الجمهور العام.
وقال العوضي في فيديو عبر حسابه الرسمي على فيس بوك: فيه موضة طالعة اليومين دول إن أحمد العوضي بيكرر نفسه، وكل واحد كاتبلي بوست مفكر إنه عنده رأي عام.. يا جدع هو عرب السويركي زي جابر الكوماندا.. فيه حد بياخد جائزة أحسن ممثل في آخر 4 سنين غيري.
العوضي: مش ممكن أعمل شخصية عايشة في فيلا
كما أوضح العوضي سبب اختياره لأدوار تنتمي للبيئة الشعبية، مشيرًا إلى أنه يفضل تقديم شخصيات قريبة من واقعه ومن الجمهور.
وأضاف: الناس بتقولي أنت مبتعملش دكتور ولا حد عايش في فلل ليه؟، هو مينفعش أعمل دكتور في منطقة شعبية؟، إزاي أعمل شخصية عايشة في فيلا وأنا معشتش في فيلا؟، الناس بتقول إني شبههم، ودي عندي بالدنيا.. ونفسي أكسب 10.000 بني آدم
وفي وقت سابق، شدد العوضي على أن حب الجمهور يمثل أهم أولوياته حتى لو لم يكن نجمًا بالمعايير التقليدية، قائلًا:
الناس اللي بتقول عوضي بيطلع عفي في المسلسلات، عايزني أطلع إزاي وأنا ممثل أكشن؟، أطلع ضعيف؟، لما أطلع مضروب هتبقى مبسوط يعني؟.. أهم حاجة عندي إن الناس تفضل تحبني حتى لو مش هكون نجم.
وأكد العوضي أنه رغم الانتقادات فإن أعماله تحقق أعلى نسب مشاهدة، كما أنه حصل على جائزة أفضل ممثل على مدار السنوات الـ 4 الماضية، وهو ما يعد دليلًا على نجاحه الفني.
