أبرز تصريحات كارول سماحة: زوجي فخور بيا.. وهوقف غناء لما أحس أن صوتي مش مطاوعني
حلَّت الفنانة اللبنانية كارول سماحة، ضيفة على أحد البرامج التليفزيونية وتحدثت خلال اللقاء عن تفاصيل علاقتها بـ زوجها الدكتور وليد مصطفى، بجانب حديثها عن عائلتها ومشوارها الفني ومتى ستفكر في قرار اعتزال الفن.
أبرز تصريحات كارول سماحة
- أنا محظوظة بـ عائلتي هما مثقفين ومنفتحين وبيتقبلوا التطور ومعنديش أب متسلط، وفي توازن بين والدي ووالدتي وإخواتي.
- جالي اكتئاب بسبب أحداث غزة ولبنان، ووقت أحداث لبنان كنت لسه منزلة الألبوم بتاعي ولكني نسيته بسبب الأحداث وحسيت أن البلد هتطير، وكان عندي غضب كبير بسبب الأحداث وحظ الألبوم، زوجي سمعني وامتص غضبي ولكني بخبرتي كان لازم منكدش جو البيت خاصة أن بنتي حساسة جدًا.
- استغليت الغضب ده وكتبت 10 أغاني رومانسي كلماتي وألحاني، ومكنتش فاهمة إيه الرابط بين الشيء الوطني اللي كنت موجوعة ومرعوبة عليه وبين الأغاني اللي كتبتها.
- عمتي اللي أخدت الصوت منها فضل صوتها قوي وحلو لعمر الـ 75، ولو أنا في نفس العمر وصوتي حلو وصحتي كويسة مش هوقف غناء، ودايمًا بقول هوقف لو بحس أن صوتي مش مطاوعني.
- وليد زوجي مش متطلب ومش نكدي، وعمري ما اختلفت معاه بسبب الديانة أو الثقافة أو شغلي، ومعاه اتعلمت أني انجذب للراجل الذكي، وهو قدر يحتضني وقدرت أكمل معاه.
- الجواز روضني بطريقة حلوة، حبيت التفكير اللي وصلت له، طول الوقت حاسة أن زوجي فخور بيا وعايزني أنجح أكتر، الراجل لازم يفضل في نظر المرأة مصدر للأمان ومعطاء.
- دلوقتي خيانة المرأة للرجل بسبب أنها بقت راجل البيت وبتصرف أكتر منه، النسوية بقت تربي بنات بتتخانق مع الرجالة بس، خلوها في حرب مباشرة مع الرجل، أنا مش في صراع قوة.
- أنا مطلبتش من زوجي ينتج لي أغاني لأني مش عايزة، لما أشتغل يكون علشان موهبتي مش علشان جوزي بينتج لي، أنا موهوبة وعارفة نفسي مش محتاجة حد ينتج لي أغاني، ولما الشغل بيدخل على علاقة الحب بيبوظ، واللي مزعلني أن النسوية حطتنا في حرب مع الرجل.
- فيروز كنا على طول بنسمعها الصبح في لبنان، دلوقتي مبقيناش نسمعها كتير في الراديو زي زمان، وفي مصر قليل لما أسمع أم كلثوم، جيل كبير كامل مش عارفينهم، علشان كده مبقتش أآمان بفكرة أن الأغنية بتعيش.
- الفنانين عاملين زي البورصة بيطلعوا وبينزلوا، والضوء في الزمن ده بقى مصطنع، في ناس بتوصل وهي مفيش عندها موهبة أكتر من ناس موهوبة وعندها كاريزما.
