طارق الشناوي: محمد سعد نجح في الدشاش بسبب الممثل اللي جواه
تحدث الناقد الفني طارق الشناوي، عن عودة الفنان محمد سعد من جديد لساحة السينما بعد غياب، وذلك من خلال فيلم الدشاش، الذي تربع على قائمة إيرادات شباك التذاكر منذ عرضه في موسم أفلام رأس السنة 2025.
وقال طارق الشناوي، في مداخلة هاتفية بـ برنامج الستات مع الإعلامية سهير جودة: محمد سعد أنا متابعه من آواخر الثمانينات من أول أدواره الصغيرة، ودايمًا بشوف فيه ممثل موهوب والقفزة اللي عملها في اللمبي خلته يتربع على العرش، واللي حدث أن 2002 من فرط النجاح السينما المصرية كان فيها أكبر شركتين توزيع كان بينهم حرب بسبب النجاح الطاغي اللي عمله محمد سعد، وده نجاح أسفر عن صراع عميق بين شركات الإنتاج والتوزيع، اللي حصل أن محمد سعد زي بعض النجوم مبيقدرش يتعامل مع النجاح الطاغي، والنجاح الطاغي له أشواك.
وتابع الناقد الفني طارق الشناوي، قائلا: محمد سعد استثمر النجاح حتى فيلمه الأخير كان من 5 سنين، يعني حصل مسافه بينه وبين شركات الإنتاج، وفهم متأخر أنك لا تصل لمرحلة التشبع مع المشاهد، والجمهور اتشبع من اللمبي، وهو راهن على الجزء العميق اللي جواه اللي هو الممثل اللي ممكن يبكيك ويضحكك، ولقى النص والمخرج اللي هو سامح عبد العزيز، الحالة اللي مخليه الفيلم جايب إيرادات ضخمة كلنا بنتابعها.
وأضاف: أنا كنت رايح العرض الخاص ودي مش من عادتي وكنت خايف الفيلم يتشال زي أفلام سعد الأخيرة، وفوجئت إن أنا كنت آخر واحد يوصل الحفل، وكمان عملوا له حفلة إضافية وده لأول مرة بيحصل كده، وهو داخل مع أفلام قوية وأنه ينجح وسط الصراع الحاد ده دليل على أن حصل توافق والموجة واحدة مع الجمهور، ومفتاح الفيلم أنه بيتكلم عن التناقضات.
واختتم طارق الشناوي: أتمنى أن يتمرد محمد سعد على الدشاش، كما تمرد على اللمبي، واللي نجح محمد سعد في فيلم الدشاش هو الممثل اللي جواه مش الإفيهات، الفيلم مفيش فيه إفيهات كتير ولكن ده المزاج المصري الشعبي واتلعب عليه صح.
فيلم الدشاش
ومن ناحية أخرى، فيلم الدشاش من بطولة مجموعة من أبرز الفنانين منهم: الفنان محمد سعد، زينة، باسم سمرة، نسرين أمين، وعدد آخر من الفنانين والعمل من إخراج سامح عبد العزيز.
