فيفي عبده: أنا عاملة 37 عمرة وحاجة 5 مرات وحياتي التجارة مع الله.. وسعيدة بعودتي للدراما
أعربت الفنانة فيفي عبده، عن سعادتها الكبيرة بعودتها للسباق الدرامي من جديد، من خلال مشاركتها في مسلسل العتاولة 2، الذي سيعرض في رمضان المقبل 2025، بجانب تعليقها على استمرار نشرها مقاطع فيديو لـ رقصها وتفاعل الجمهور معها.
وقالت فيفي عبده، في تصريح خاص لـ القاهرة 24: أنا سعيدة بعودتي للدراما من جديد بعمل كبير زي العتاولة، والجمهور مستني يشوفني وهيشوفوني في رمضان 2025، وأنا مبسوطة بالتعاون مع كل النجوم في العمل دول أساتذة، ولكن مقدرش أوعد جمهوري بـ حاجة في رمضان دي حاجة مقدرش أتكلم فيها، أنا بعمل اللي عليا والباقي على ربنا.
وعن تفاعل الجمهور مع فيديوهات رقصها، فعلقت فيفي عبده: أنا بحب الرقص جدًا ومبحبش الحزن والاكتئاب وبحب الفرحة، وجمهوري الصغير اللي حاسس بـ ده.
فيفي عبده: سر شبابي التجارة مع الله
وكشفت الفنانة فيفي عبده، عن سر حفاظها على شبابها، قائلة: شبابي وجمالي من عند ربنا، وأنا بحمد ربنا على كل اللي أنا فيه، وبقول للناس يعملوا تجارة مع الله هيوصلوا لـ اللي أنا فيه، وأنا شايفة أن اللي أنا بعمله هو ده الصح، أنا عاملة 37 عمرة وحاجة 5 مرات ودي حاجة اتجهت لها من 37 سنة.
وتابعت فيفي عبده: هي دي حياتي التجارة مع الله وأعمال الخير محدش يعرف عنها حاجة، وكله عند ربنا وكلنا بنقول يا رب وهو اللي بيبعت كل حاجة.
