مفيش دكاترة هنا.. فتاة تشكو من مستشفى الميري بالإسكندرية: قلتلهم أبوس رجليكم أختي بتموت
اشتكت فتاة تُدعى أسماء صلاح، تقيم بمنطقة سيدي بشر التابعة لمحافظة الإسكندرية، من مستشفى الميري التعليمي، بعد رفض الطاقم الطبي بالمستشفى دخول شقيقتها، وتعاملهم معها بسلبية شديدة -على حد قولها-، عندما ذهبت للمستشفى تستغيث لعلاج شقيقتها التي تعرضت لحرق شديد.
وقالت الفتاة أسماء صلاح في تصريحات خاصة لـ القاهرة 24: من كان يوم حصل عندنا حريق جامد في البيت، لدرجة إني مكنتش شايفة أي حاجة بسبب الدخان، وشوفنا الموت بعنينا وكنت بطفي الحريق بإيدي، وكل اللي حوالينا في الشقة مكنتش شايفاه، وفجأة جريت أفتح الباب لكن مكنش راضي يفتح خالص، ووقتها أختي كانت في المطبخ وبتجري عليا، ونزلوا الجيران كسروا علينا الباب.
فتاة تشكو من مستشفى الميري بالإسكندرية
وتابعت: جرينا على مستشفى الميري، وأول لما وصلنا على البوابة لقينا اتنين ممرضين واقفين ومبتسمين أوي كأني بعزمهم على فرح أو عيد ميلاد مش جايه وأختي محروقة، وبمنتهى البرود بيقولولنا الدكاترة مش موجودين مفيش دكاترة هنا، رديت قلتلهم أبوس رجليكم أختي بتموت مني، وطبعًا مرضيوش يدخلونا وإحنا جايين من مشوار، وأختي مش مستحملة حاجة.
وأضافت: منظر أختي كان يخوف، مفيش ملامح ولا شعر، والجسم متبهدل من الحريق والممرضين مجرد ما بصوا على الحالة قالوا مفيش دكاترة عندنا، كل ده وأختي مولعه قدامنا، وسبناهم وروحنا مستشفى تاني.
واختتمت أسماء: أختي دلوقتي حالتها صعبة، والدكاترة بيقولوا إحنا سايبينها على الأجهزة لعل وعسى تتكلم أو تقوم، لأن درجة الحريق 97% وهي دلوقتي في رعاية ربنا وقسم الحروق ممنوع فيه الزيارات.
