كامل الوزير: “بعنا خردة السكة الحديد بـ340 مليون جنيه فى جلسة واحدة بدلاً من 12 مليون سابقاً”
عبر المهندس كامل الوزير، وزير النقل والمواصلات، عن أسفه لعدم حضوره في المرة الأولى عندما تمتم دعوته بسبب حدوث لبس في استلام خطاب الدعوة لمجلس النواب.
وأوضح وزير النقل، خلال اجتماع لجنة الإدارة المحلية بمجلس النواب برئاسة المهندس أحمد السجينى، مساء اليوم الأحد، بحضور وزير النقل، في زيارته الأولى للبرلمان منذ توليه المنصب، أنه يحرص على تعظيم الموارد فى الوزارة بكل قطاعاتها للحفاظ على المال العام ومنع إهداره وضبط الأداء، ما يساعد على سرعة تنفيذ المشروعات وتحقيق الصالح العام.
وأكد “كامل”، موجهًا حديثه للنواب: “أشكركم على دعوتكم لى، وأعتذر عن دعوتكم لى المرة اللى فاتت وإنى مجتش، لأن حصل لبس فى عرض الخطاب الخاص بالحضور باجتماع اللجنة، وبمجرد ما عرفت إن الجلسة منعقدة بادرت واتصلت برئيس اللجنة، ومقدرش اتأخر، أنا بمجرد ما أعرف إن حد عايز يقابلنى يشوف شغلنا، بحب أروح للناس علشان يطمنوا على بلدهم وعلى الشغل، وبرحب إنى أجى مجلس النواب ونتكلم ونعرف المشاكل ونحلها، وإن النواب تتواصلوا معايا ومش هسييبكم وهنطلع مع بعض كل يوم وننزل مع بعض الفجر ونشوف طرق وكبارى وغيرها، وبخصوص ميناء البحر الأحمر، لو ثبتولى إن فعلا فيه قصور فى الميناء، انتوا جهزولى من دلوقتى أحسن واحد يمسك رئيس هيئة ميناء البحر الأحمر، انتوا اللى حاسين بالناس وانتوا اللى هتنقلولنا مطالبهم ومشاكلهم”.
عاجل.. كامل الوزير يحيل 28 موظفاً بالسكة الحديد للنيابة لتعاطيهم المخدرات
وذكر: “أنا حتى الآن مخدتش مليم من الدولة، والحمد لله بدأنا نعظم مواردنا، ونحاول نمنع التزويغ والهروب من التذاكر، وفى أسبوع جايبين إيراد أعلى من الأسبوع اللى قبله، فالإيرادات كانت حوالى 41,7 مليون الأسبوع اللى فات، بزيادة عن الأسبوع اللى قبله 8,4 مليون، واللى فى أيدينا من موارد نعظمه ونستخدمه أحسن استخدام، لنلبى مطالبكم ومطالب الشعب الذين تمثلوه، فالسكة الحديد والموانئ والنقل النهرى والكبارى كله فيه مشاكل وعدم انضباط، وأنا عندى اليوم 24 ساعة ملكوش عندى غير 24 ساعة، هنشتغل مع بعض 24 ساعة، ومن ستمتد ايده على المال العام مش هسيبه، وبعد اعتماد الموازنة هنبدأ نعظم المشروعات التى اعتمدت لينا، ونحاول أن نأخذ إمكانيات أكبر شوية من المتاح لوزارة النقل، لأنها تتابع مشروعات عديدة، ومؤشرات الموازنة بتقول إنه احتمال يعتمد لينا فى وزارة النقل 35 مليار جنيه، لكن ميعملوش الشغل والمشروعات اللى تخلينى أقول إنى خلال سنة عملت حاجة، فهناك طرق عديدة يتم العمل على تنفيذها، وهناك 10 محاور على النيل، كلهم شغالين فيهم فى وقت واحد وليهم خطة، نخلص العشرة دول الأول ويدخلوا الخدمة والناس تستفيد بيهم”.
وأشار إلى أن: “هناك تشريع نحاول نعده بخصوص الطرق، ولحد ما يعد هذا التشريع، أصدرت قرارًا وزاريًا لكل مديريات الطرق، نحاول نساعد المحافظات فى الطرق الداخلية، ونختار الطرق المؤثرة التى تتكامل مع بعضها من حيث جودة الطرق والتكلفة المالية، هنساعد المحافظين، وكلهم مرحبين وشايفين إن دى خطوة لابد تتعمل، وفى وقت قريب هقولكم تعالوا الخطة بتاعتنا أهى، دا نظام شغلى مش بحب أضحك على حد، اللى هقدر اعمله هعمله، عايزين نتكلم عن طريق يخدم الناس، محدش يجى يقولى عايز اعمل 100 متر أدام بيتى، بنتكلم عن طرق داخلية وطرق رئيسية بين المحافظات، ونستهدف إننا نسهل على المواطن”.
وعن الوضع فى السكة الحديد، قال وزير النقل: “السكة الحديد فيها شغل كتير جدا، الخردة مثلا كانت تباع فى أحسن سنة بـ12 مليون جنيه، خردة قضبان عربيات نقل وغيرها، وناس تعمل حركات مش مضبوطة، 12 مليون فى الكهن الثمينة، إحنا قولنا الكلام دا مينفعش، وفى جلسة واحدة بيعت بـ340 مليون جنيه، وعايز أقولكم اطمنوا وادونا فرصة وهتشوفوا نتيجة مجهود كبير وتوفير كبير فى الفلوس وتعظيم فى الموارد المتاحة، هنعمل اللى يرضى ربنا ويرضيكم ويرضى شعبنا العظيم”.
وعن مكان ولادته وعن أصله أكد الوزير قائلًا: “أنا من قرية فى مركز المنصورة بمحافظة الدقهلية”.
