86 ألف جنيه│ أحد ضحايا FBC يستغيث: تعب سنين راح.. وعايز حقي
تعددت القصص والروايات لضحايا منصة FBC للتسويق الإلكتروني، بعد أن سرق القائمون عليها أموال عملائهم المُشتركين في باقات تبدأ من مئات الجنيهات حتى الملايين، من بينهم شاب كان يسعى دائمًا للبحث عن فرص تحسين المعيشة ولكن سرعان ما جاءت هذه الواقعة لتخطف أحلامه وطموحاته قبل أمواله.
أحد ضحايا FBC يستغيث: عايز أجيب حقي
وأعرب الشاب أحمد خميس من الإسكندرية، خلال حديثه مع القاهرة 24 أنه فقد جميع ما يملك من أموال عبر منصة FBC الوهمية: خسرت كل فلوسي، تحويشة عمري كلها وشغل 15 سنة.
وأشار إلى أن هناك شخصًا مسؤول يزعم بأنه من الصم والبكم، هو الذي كان يدفعهم نحو دفع الأموال، قائلًا: كان في مشرف لجروب الواتس آب بيقول إنه أطرش، عشان كدة كان بيتواصل معنا عن طريق الكتابة فقط، كان دايمًا بيطالب الناس إنها تحط فلوسها كلها بشكل متكرر، حتى الأرباح كان بيقولنا نحطها عشان تجيب فلوس أكتر، واستخدم صور بنوك مزيفة لكسب ثقتنا.
واستغاث قائلًا: أرجو رد حقوقنا من النصابين والقائمين على منصة FBC الوهمية، حتى ولو 50% من المبلغ.
الضحية: صاحبي قالي وأنا وافقت
وأضاف: قلبي واجعني ومصدوم مش عارف أعمل حاجة، واحد صاحبي من المنصورة كان غرضه يفيدني وأنا كنت بثق فيه، قالي عليها ووافقت حطيت فلوسي كلها.
وأردف أحمد: الناس اللي بتنتقد وبتقول إن ده طمع، أنا كنت غريق بتعلق بقشاية وحد قالي هيساعدني، محدش يعرف ظروفي، التعليقات بتاعة الناس توجع أكتر من السرقة نفسها حسبي الله ونعم الوكيل.
الضحية: قلبي واجعني على الناس اللي باعت بيوتها
وقال: مهندس زراعي اشتغلت كتير أكتر من شغلانة، وعندي مسؤوليات كتير، لما أتقلى على الفرصة دي مفكرتش الحاجة دي كذب ونصب أو لأ، كنت أول مرة في حياتي أفكر في حاجة زي كدة واشتركت لمدة 3 أسابيع، وكان عندي أكتر من حساب 11،200 ألف،37 ألف، 37 ألف، 900 جنيه.
وعن مشاعره تجاه الآخرين، عبر قائلًا: من ساعة ما عرفت الخبر وأنا مصدوم، وخايف على غيري اكتر من نفسي، لأن أنا تحت سقف بيتي الحمد لله لكن في غيري باع بيته علشان يعرف يعيش أولاده أحسن.
