بتجمع تبرعات كأنها بتشحت.. اتهامات للبلوجر تمارا بالنصب: كانت بتغير صوتها على أنها أم محتاجة
تصدر اسم البلوجر تمارا فاروق تريند مواقع التواصل الاجتماعي، بعد نشر عدد كبير من ضحاياها وقائع النصب التي ارتكبتها على مدار السنوات الماضية بعد حصولها على تبرعات ومساعدات وهمية، شملت مبالغ وأدوية وعبوات حليب، من خلال حسابها الرسمي بـ موقع فيسبوك، الذي كانت تنشر من خلاله صورًا لحالات بحاجة للمساعدة، لذلك استطاع ضحايا البلوجرتمارا فاروق، اكتشاف الأمر بعد ملاحظتهم أن الصور التي تنشرها للحالات مكررة.
إحدى ضحايا تمارا تكشف كواليس وقائع النصب
وقالت إحدي ضحايا تمارا فاروق، وتُدعى علياء محمد في تصريحات خاصة لـ القاهرة 24: أعرف تمارا من زمان أوي على فيسبوك، وطول الفترة اللي فاتت كنت ببعتلها فلوس مساعدات على المحفظة، وكانت بتبعتلي أرقام كتير أوي، وأنا زي العبيطة كنت بحول فلوس عليها، وطلع إن كل الأرقام دي وهمية مش حقيقية، وطلعت مش أنا لوحدي، فيه ناس كتيير أوي نصبت عليهم.
وتابعت: مرة كانت بتطلب مني 500 جنيه ومرة 900، وفي مرة خدت مني 3000 جنيه عشان حالة المفروض، بس كل ده نصب وأنا كنت ببعتلها ومعرفش، ومن أغرب الحاجات اللي سمعتها إنها لما بتبعت لحد رقم أهل طفل محتاجين مساعدة بتقلد صوت أم الطفل ده، وتعمل نفسها الست اللي محتاجة، حقيقي حرام عليها تتاجر بالمرض وتعب الناس دي، كنت بلاحظ إنها بتيجي تطلب مني تبرع بمبلغ معين وتقولي هبعتلك بعدها الصور، تقوم بعتهالي المرة اللي بعدها لما تطلب فلوس تاني، والفكرة إنها كانت بتطلب تبرعات بطريقة شحاتة، يعني فيه ناس كتير في المجال ده وبياخدوا تبرعات بس هي كنت بحسها بتشحت فعلا ومش طبيعية.
وأضافت: اللي كشف حقيقتها إن الناس اللي كانت بتبعتلهم روشيتات وصور للأدوية وأي ماتريال لحالات عندها، اكتشفوا إن الحاجات دي مكررة وشافوها قبل كده، وبدأوا يبلغوا عنها وينزلوا بوستات على فيسبوك، ويفضحوها عشان هي تستاهل، بصراحة كانت شخصيتها غريبة تنزل ستوري تطلب تبرع بمبلغ صغير أوي، بعدها بـ ساعة اتفاجئ بيها إنها بتتغدى برة، طب ما كنتي توفري فلوس الغداء وتتبرعي بيها أحسن.
