أقوال المتهم الرابع بقتل شقيق محامٍ بالقليوبية: يوم الواقعة سرقنا 5 أشخاص ونصيب كل واحد كان 1200 جنيه | خاص
يستكمل القاهرة 24 نشر التحقيقات في واقعة مقتل شقيق محامٍ بالقليوبية على يد تشكيل عصابي، اعترض طريقه خلال سيره على الطريق الدائري، ومحاولة سرقته تحت تهديد السلاح.
أقوال المتهم الرابع بقتل شقيق محامٍ بالقليوبية
وبمثول المتهم الرابع محمود. ع. ج. م أمام جهات التحقيقات المختصة وبسؤاله حول ما هي تفصيلاته بشأن الواقعة؟، أجاب: اللي حصل بالظبط إن من حوالي 10 أيام كان يوم موافق يوم 3 اتقابلنا مع بعض ووقفنا عن الخصوص، وأحمد ومصطفى قالوا يلا نشتغل مع بعض نسرق موبايلات، وكنا جنب بعض وفضلنا رايحين جايين على الدائري أكثر من مرة، لحد ما سرقنا موبايل من واحد، واللي سرقه مننا كان مصطفى بصلة.
وأضاف: وكان أحمد. ر، والرجالة اللي معاه سرقوا 3 موبايلات واتقابلنا عند نزلة مسطرد، واتفقنا إن كفاية كده، وهنروح بعد ما نبيع الحاجة ونقسم الفلوس، بس أول ما نزلنا لقينا أحمد رضا واللي معاه مشيوك بالمكنة على الطريق المقابل لينا ووقتها أحمد شاف واحد ماشي لوحدة قدام شوية راح قال بصوت عالي يلا يا مصطفى ناخد الواد دا واحنا مروحين.
وواصل المتهم الرابع: وبعدها على طول نزل أتكلم مع الراجل ومسمعناش هما بيقولوا إيه، وبعدها لقينا أحمد.ر، رفع الشنطة على صدر الراجل ورفع في وشه الفرد، بس الراجل مكنش راضي يسبب الشنطة، وفضل ماسك فيها جامد، وشوفت أحمد وهو بيضربه أكتر من ضربة بجسم الفرد على دماغه من ورا وقفاه.
واختتم المتهم: الراجل كان ماسك في الحاجة جامد وبردو أحمد حط الفرد على صدره وضربه طلقة والراجل وقع في الأرض، وفي الوقت دا بصلة نزل من التوك توك عدى لنص الطريق، وكان فيه ناس بالعربيات بتهدي علشان تقف راح مصطفى بصلة، ضرب طلقة في الجو علشان نعرف نهرب، ووقتها هربنا وبيعنا الحاجة وكان نصيب كل واحد فينا 1200 جنيه، وروحت بيتنا وبعدها بحوالي 3 أيام اتقبض عليا وخدوني من بيت أختي ودا كل اللي حصل.
