فتاة تزعم تعرضها لتهديدات علي يد خطيبها السابق: خايفة مصيري يكون زي نيرة أشرف
نشرت فتاة تدعي جهاد جميل منشورا علي موقع التواصل الاجتماعي فيسبوك تزعم تلقيها تهديدات ومضايقات من خطيبها السابق حيث قام بنشر صورها مع عبارات مسيئة لسمعتها بعد رفضها الارتباط به بمحافظة الدقهلية.
وقالت جهاد جميل في منشورها: أنا كنت مخطوبة في سنة 2018 لواحد اسمه ( أحمد كمال هاشم) من الدقهلية من مركز ميت سلسيل زي ما هو مكتوب في صورة بطاقته وفسخت الخطوبة ومن ساعتها وهو مبهدل حياتي وبيتصل على أهلي ومبيبطلش يكلمهم وغيرت أرقامي بس هم مغيروش أرقامهم على أساس هينسى وقفلت اكونت الفيسبوك بتاعي واختفيت تماما بسبب المضايقات.
وأضافت الفتاة في منشورها: حاولت اتفاهم معاه بس هو مش راضي يبعد وبهدل حياتي ومهدد أمني وكل ما أرتبط أو أتخطب يروح يكلمه ويعملي مشاكل معاه ويدمر العلاقة.
وأردفت الفتاة في استغاثتها: ومن بعدها بعدت عن المدينة اللي أهلي عايشين فيها وقلت يمكن ينسى ويبطل يعمل كده، بقيت حاسة اني مهددة ومرعوبة يظهر لي في أي وقت، بقيت شاكة في كل الناس، وهو زي ما هو يختفي فترة ويرجع تاني يرن على اهلي ويعمل اكونتات باسمي وبصورتي ولما اجي ابلغ الفيسبوك يقولي مفيش احتيال ولا حاجة وطبعا بيكلم الناس على أنه انا ويديهم ارقام اهلي ويقول كلام وحش جدا ومسئ ليا لحد ما بقيت في 2023.
وأكملت الفتاة في منشورها: اتخطبت وحكيت لخطيبي عليه اول ما اتعرفنا عشان لو حاول يكلمه وفعلا حاول يكلم خطيبي وقال عليا كلام قذر جدا وأهان اهلي وبهدلني وبهدل سمعتي وساعتها خطيبي ده طنشه وعمله بلوك واتجوزنا، وقلت خلاص خلصت منه وهعيش من غير رعب تاني.
وتابعت: من شهرين قررت احط صورتي على الايميل الشخصي بتاعي اللي ببعت منه ايميلات وبستخدمه في حياتي وفي الشغل،راح واخد صورتي وحطها على اكونت وحط عليها ارقام اهلي، وبيكتب كلام قذر عشان يتصلوا علي اهلي، والمرة دي رحت عملت بلاغ في مباحث الانترنت ومعايا الصور وكل حاجة، والمحضر راح النيابة ورقم المحضر (رقم المحضر 24 احوال بتاريخ 18 يناير) قالوا لي حتى لو خد حكم فهم هيستنوا لما يعدي على كمين ولا حاجة ويتمسك وطبعا ده ممكن ميحصلش والمحضر اتحفظ ورحت عملت محضر في النيابة وبرضه اتحفظ من غير ما اقابل رئيس النيابة.
انا حاليا عايشة برة القاهرة مرعوبة ازور اهلي في القاهرة، خايفة اخرج من الغردقة يقتلني زي نيرة ولا يقتل جوزي عشان جوة دماغه انه بيحبني وعايز يتجوزني، انا مرعوووبة ونفسي في حل يرحمني من القلق ده.
