حازم إمام يعلن رحيل زيزو لـ الأهلي.. ويكشف حديث محمود الونش معه
تحدث حازم إمام عضو لجنة التخطيط في نادي الزمالك عن بعض الأمور التي تخض الثنائي أحمد سيد زيزو ومحمود حمدي الونش، وأخبار انتقالهما للنادي الأهلي خلال الفترة الماضية.
تصريحات حازم إمام
وقال حازم إمام في تصريحات تليفزيونية: ممدوح عباس موعدنيش بالتجديد لـ زيزو، معرفش إذا كان وعد الإدارة ولا لأ، وراتب زيزو السنوي هو من يتحمله.
وأضاف: لن أفصح عن الحديث بيني وبين زيزو ولا أحب الشخص الذي إذا خاصم فجر، ولو في كلام بيني وبين حد مش هطلع أقوله، بس كان في تأكيدات دائمًا من زيزو إنه عايز يكون في الزمالك وإنه بيحب الزمالك.
وتابع: كان فيه تطمينات على طول من زيزو إنه عايز الزمالك.. ولكن زيزو خلاص رحل إلى الأهلي وأي حديث آخر لن يفيد.
وأوضح: كنت بقول لـ والده متعاملش نادي الزمالك على اللي بيديروه دا كيان كبير مش مِلك لحد ولا لأشخاص، والمواضيع المادية زيزو ووالده كانوا موافقين عليها.. والمبالغ التي تحدث فيها تم عرضها عليه أو حتى كانت قريبة.. والزمالك لم يقصر في ملف التجديد لـ زيزو.. وإنت لو عايز مكان فانت هتضحي كتير عشان تفضل في المكان.
واستكمل: زيزو نفسه قال لي أنا فاضلي 40 هدف وأبقى الهداف التاريخي لنادي الزمالك وعايز أقعد، وزيزو كسب ماديًا وربنا يزيده، ولكنه ينظر للي عمل قبله كدة ويشوف نجح ولا لأ.
وأفاد: يوم السفارة هي التي أكدت لنا أن زيزو وقع لـ النادي الأهلي وهذا ما قطع الشك باليقين، وزيزو لحد دلوقتي بيقول إنه موقعش لحد.. ولكننا عارفين إنه رايح الأهلي ودا اللي ضايقني وإنت لو مضيت قولنا بس الزمالك لم يقصر ووفّر الشروط المادية التي طلبها أحمد سيد زيزو، وربنا يوفق زيزو، وأنا كـ حازم إمام من بعد ما رضا عبد العال رحل من الزمالك لـ الأهلي فأي حاجة عادي بالنسبة لي.
وعن حديث الونش معه، كشف حازم إمام عنه وقال: الونش طلع كلام إنه مضى للأهلي فكلمته قلتله إيه اللي أنا سامعه دا أنا مش مصدق قالي عيب يا كابتن أنا مش كدة وعمري ما أعمل كدة.
وأتم: صلاح بعيد عن زيزو، وأهم لاعب في العالم، ليفربول مكنش عارف يتفاوض معاه عشان يصل لحل معاه، فـ فكرة إن حتى لو النادي غلطان بس اللاعب عايزك أو عايز يفضل أسطورة فـ دا هيحصل والنهاردة صلاح طبقها.
