بعد مزاعم فتاة الأتوبيس الترددي.. أول تعليق من الشاب الظاهر بالفيديو: بيني وبينها مترين واتهمتني بالتعدي والسرقة
كشف أسامة محمد، الشاب الذي ظهر في واقعة فيديو الأتوبيس الترددي المتداول على مواقع التواصل الاجتماعي، تفاصيل ما حدث في أول تعليق له، مؤكدًا أنه تعرض لاتهامات باطلة بالتحرش والسرقة رغم عدم وجود أي احتكاك بينه وبين الفتاة.
أول تعليق من أسامة متهم تحرش فيديو الأتوبيس الترددي
وقال أسامة لـ القاهرة 24 إنه أنهى عمله في الخامسة والنصف مساءً، واستقل الأتوبيس الترددي متجهًا إلى طريق الأوتوستراد، مشيرًا إلى أن الطريق كان شديد الزحام، وأن المسافة بينه وبين الفتاة كانت لا تقل عن مترين.
وأضاف، فجأة لقيتها بتقول عليا متحرش وحرامي، والكمسري كان معدي قالها يا بنتي محدش خد منك حاجة، ردت وقالت لأ ده من زمان خد مني 200 جنيه، والناس كلها كانت مستغربة وبيقولوا إن البنت دي عندها حالة ومش طبيعية.. الموضوع بقاله أسبوع على كلامها، طيب لو أنا بضايفك وبسرقك من أسبوع، إزاي مستحملة كل ده وساكته؟.
وأوضح أسامة عن الجدل الذي أثير بسبب حديثه عن ملابس الفتاة، قال: الناس هاجمتني علشان كلمتها على اللبس، وأنا قلت إن ده مش مبرر لأي حاجة، والراجل اللي كان ماسك سبحة جنبي لما سمعها بتقول ديني وديني قالها الدين بريء منك بسبب لبسك.
وأشار إلى أن عدد من الركاب طلبوا منه الابتعاد عنها حتى لا تتفاقم المشكلة، مؤكدًا: أنا راجل متربي ومتجوز وعندي أخت وأم، وحسبي الله ونعم الوكيل حقي هيرجع وهيظهر، والبنت دي شهرت بيا واتبلت عليا، ومش هسيب حقي بالقانون.
واختتم حديثه بالتأكيد على ثقته في الأجهزة الأمنية لكشف حقيقة الواقعة، ومحاسبة من أساء إليه أمام الرأي العام.
