خدت قلم على وشي.. لقاء الخميسي تكشف تفاصيل معرفتها بزواج محمد عبد المنصف
كشفت الفنانة لقاء الخميسي، تفاصيل معرفتها بزواج زوجها محمد عبد المنصف، سرًا منذ سبع سنوات، موضحة أنها كانت تعلم بأمر الزواج منذ شهر أكتوبر الماضي خلال وجودها بمهرجان الجونة السينمائي، مؤكدة أنها علمت بطريقة لئيمة على حد وصفها.
وقالت لقاء الخميسي، في برنامج Mirror: عرفت من شهر 10 من وأنا في الجونة بشكل لئيم، حد كان جاي قاصد يوصلي المعلومة ولما رجعت قولتله وبعدها بيومين قالي إن ده حصل، مستقبلتش الخبر بـ هدوء خالص وحسيت أني خدت قلم على وشي والدنيا أسودت على الكل، وعلى مدار 7 سنين محستش بأي تغيير ولا شكيت فيه ومقصرش معانا ولا كان فيه أي غلطة.
أول تعليق للقاء الخميسي على أزمة زاوج محمد عبد المنصف
وكانت الفنانة لقاء الخميسي، علقت على أزمة زواج محمد عبد المنصف، موضحة أنها سامحته حيث كتبت عبر إنستجرام: الدنيا تختيرنا دائمًا وأبدًا، أيام بتسعدنا وأيام بتبعدنا وتزعلنا وتجرحنا، وبنتوه مع نفسنا، الحكمة بتظهر من قلب الحزن.. وبنقعد نفكر إيه الصح وإيه الغلط وهل اللي عدينا بيه شر ولا خير؟ ومع الوقت ولما النفس تهدى والعقل يفكر والقلب يدق، بنكتشف إن كلنا بنغلط وبنتوه شوية في وسط الزحمة، فيه ناس بتغلط وتكمل في الغلط! وفي ناس بتغلط وبترجع لحكمتها وبتندم وتصحح الخطأ.
وأردفت لقاء الخميسي: خطائين وخير الخطائين التوابين، مفيش حد مابيغلطش، بس القوي الحقيقي بيعترف بالغلط وبيرجع لصوابه، ربنا فتحلنا باب المغفرة والسماح، شكرا من قلبي لكل إنسان دعمني ووقف جنبي وطبطب عليا، وشكرا لكل أصدقائي المقربين اللي وقفوا جنبي وكل من دعمني من أصدقاء السوشيال ميديا اللي نوروا حياتي بالمحبة وكل اللي طبطب على قلبي ودعالي دعوة حلوة.
