مش عارفة عنهم حاجة.. سيدة تستغيث من أهل طليقها: واخدين عيالي من 3 سنين وحارميني منهم
اتهمت سيدة تدعى مي العسكري أهل طليقها بإخفاء صغيريها آدم إبراهيم محمد العشري 15 سنة، وألما ابراهيم محمد العشري 10، منذ 3 سنوات، حينما كانا في زيارة عائلية لهم.
وزعمت في تصريحات لـ القاهرة 24: ولادي كانوا في زيارة 3 أيام خميس وجمعة وسبت في بيت جدهم والد والدهم من 3 سنين، ومن يومها معرفش عنهم حاجة، حاولت أروح لأهل الأب أكتر من مرة وأتفاوض معاهم وإننا نحل الموضوع بشكل ودي، لكنهم كانوا بيرفضوا مقابلتي كل مرة.
مش عارفة عنهم حاجة.. سيدة تستغيث من أهل طليقها: واخدين عيالي من 3 سنين وحارميني منهم
وتابعت: بقالي 3 سنين مشوفتش عيالي، وكل ما أحاول أروح لبيت جدهم ملاقيش حد في البيت، وكنت باخد الشرطة عشان أنفذ الحضانة، واستلمهم من المدرسة في أكتوبر، لكن كل مرة إدارة المدرسة كانت بتقولي إنهم متغيبين وترفض تسلمهم ليا، بالرغم من إن معايا حضانة الأولاد والولاية التعليمية، بحسب ادعائها.
وأضافت الأم: صاحب ابني قالي وأنا واقفة قدام المدرسة مستنية أشوفهم أو أكلمهم، إن آدم موجود في المدرسة، وعمته هربته من باب تاني عشان مقدرش أشوفه، وكل ما أحاول إني أروحلها البيت أو الشغل لإنها شغالة في نفس مدرستهم، ترفض تقابلني، وإدارة المدرسة بتقولي إن عيالي متغيبين عن المدرسة بقالهم 3 سنين، وبالرغم من دا بينجحوا في الإمتحانات.
واستكملت الأم: نفسي أي حد يشوفهم أو يعرف مكانهم يدلني عليهم، والدهم عايش في الكويت، وأنا منفصلة عنه من 2015، ومش عارفة أوصل لحل معاه ومع أهله، هما كانوا مرتبين إنهم ياخدوا عيالي مني، مع إن أنا اللي كنت باخد العيال لجدهم وجدتهم وعمتهم زيارات، وكنت بسيبهم لهم وأقول حرام صلة الرحم، لكن للاسف خدوا عيالي مني وبقالي 3 سنين مش قادرة أوصلهم، وأنا بالفعل اتخذت الإجراءات القانونية ضد أهل الزوج، وفق قولها.
