رضا إدريس: جالي مرض بسبب تعبي النفسي من قلة العمل.. وبقيت أكلم ربنا أقوله أنا عايز أشتغل
تحدث الفنان رضا إدريس عن فترة غيابه عن الوسط الفني ومرضه، موضحًا أنه كان يقدم عروضًا مسرحية قليلة الأجر بسبب الاحتياج المادي.
وقال رضا إدريس خلال تصريحات إذاعية: خدت فترة كبيرة أوي يمكن تعدت السنتين وفيه ركود في الشغل والدنيا كانت صعبة عليا، وفضل ربنا هو اللي خلى الواحد يصمد، وعن طريق القعدة الكبيرة دي تعبت نفسيًا وجسديًا وجالي مرض.. الحمد لله.. الدنيا كلها مكنتش مظبوطة وبقت طويلة، وبقى فيه احتياجات وإيجار ومصروفات مدرسة، حصلي ضيق مالي كبير ومحتاجين مصاريف وأنا معنديش مصدر دخل تاني.
وأضاف: لا إله إلا الله هو مصدر دخلي، بصحى من النوم بقول يا رب وربنا مبيسبنيش، كان فيه بعض الأعمال المسرحية الصغيرة مكنش فيها عائد مريح ولكني مكنتش بقول لأ، كنت بقول أشتغل حتى لو الليلة دي بـ 300 أو 400 جنيه، لأن معنديش مصدر تاني ولما أجبهم ربنا يرزقني ويرزق ولادي ويمشونا حوالي 4 أيام غير دلوقتي، وفي الوقت ده تعبت وجالي مرض بسبب النفسية بسبب الضيق وعدم العمل والأرق، ومبقتش أقدر أمشي ولا أقعد ولا أنام، ومفيش شغل ومفيش فلوس، وبدأت أفكر أن العلاج عايز فلوس ومكنتش مشترك في تأمين طبي وبقيت اتعالج على نفقة الدولة ورحت لجراح كبير وعملت عملية ضروري.
وأردف: كنت بكلم ربنا وكنت بقرأ قرآن وبقول الأدعية اللي في القرآن وكنت بقول ربي أني مغلوب فانتصر، وبفضل الله الدنيا بدأ تفك في الشغل ولكن مرضي كان بيمنعني، والدكاترة قالوا لي أن دي مرحلة رابعة ومشكلة، ولما غلبوا فيا ربنا ألهمني أن العلاج مش عامل تأثير، وأنا كنت بقول الشفاء من عندك يا رب، والوقت ده لوحدي لقيت نفسي ببكي وأنا بكلم ربنا.
واستكمل: رحت زرت السيدة زينب ودخلت سلمت وقرأت الفاتحة لسيدنا النبي وأهل البيت، وقلتلها ازيك يا أمي، والفرج جه في ليلة من ليالي رمضان، وربنا فرجها عليا من الأهل والإخوات، وكنت قاعد في البيت لوحدي وكان قرب عليا ميعاد جواز بنتي لأنها مخطوبة وأنا مكنش معايا فلوس، وأنا بتفرج على التليفزيون كان في حوالي 50 مسلسل وأنا مبعملش مشهد واحد في مسلسل منهم، وقلت يا رب أنا ماليش غيرك بنام وصحى على خيرك ومتحوجنيش لحد غيرك.
وبكى رضا إدرس كاشفًا تفاصيل عودته، قائلًا: بقيت أقول أنا قاعد ليه يا رب؟، أنا عايز أشتغل وتشفيني وأبقى بشوف زملائي مبيقعدوش مسلسل ورا مسلسل، أنا ممكن أعمل مسلسل ولما تيجي حاجة تانية باخد حوالي 10 شهور، وقلت أروح فين يا رب؟، أنا ورايا ناس وفرح بنتي، وربنا علشان يكمل ستره عليا لقيت المنتج الفني إيهاب أيوب بيكلمني علشان نشتغل في مسلسل أجنبي، في اللحظة دي حسيت فعلًا أن ربنا سامع صوتي وبيطبطب عليا.
