طريقة عمل بسكويت جوز الهند للعيد.. سريع ومقرمش بدون تكاليف
طريقة عمل بسكويت جوز الهند، هي طريقة سهلة وسريعة ضمن طرق تحضير بسكويت العيد المقرمش بنكهات وأشكال مختلفة تزين زيارات العيد أما ضيوفك، وخاصة محبي جوز الهند. وتعد طريقة عمل بسكويت جوز الهند من الطرق التي كانت معتادة لدى ربات البيوت منذ سنوات وكان بسكويت جوز الهند يباع ضمن حلويات العيد بأشكال مختلفة، لذلك اعادة صنعه ضمن حلويات العيد يوفر المزيد من الخيارات الشهية عند التقديم. وعبر القاهرة 24 نتعرف على طريقة عمل بسكويت جوز الهند بسهولة وبأكثر من شكل.
طريقة عمل بسكويت جوز الهند
تأتي طريقة عمل بسكويت جوز الهند، كأحد وصفات بسكويت العيد المقرمش، ويقدم بأكثر من شكل، فيمكن تحضيره كأصابع البسكويت المعتادة أو دائري أو مربعًا، كلها أشكال مميزة اعتمديها لتنويع حلويات العيد:
مقادير بسكويت جوز الهند
- كيلو دقيق
- 400 جرام سمنة
- 400 جرام سكر بودرة
- 5 بيضات
- 125 جرام جوز هند ناعم
- باكو بيكنج باودر
- 2 معلقة صغيرة إسانس جوز الهند "اختياري"
- معلقة صغيرة فانيليا سايلة أو كيسين بودر
- معلقة صغيرة فانيليا بودر
طريقة عمل بسكويت جوز الهند
- اخفقي السمنة بدرجة حرارة الغرفة مع السكر البودرة في الخلاط لحد ما الخليط يبقى ناعم وخفيف زي الكريمة.
- ضيفي البيض تدريجيًا، وبعدين ضيفي إسانس جوز الهند والفانيليا السايلة والفانيليا البودر.
- اخلطي كويس لحد ما يتجانس كل حاجة.
- ضيفي جوز الهند الناعم واخلطيه مع الخليط كويس.
- انخلي الدقيق مع البيكنج باودر مع بعض، وبعدين ضيفيهم على الخليط تدريجيًا.
- اعجني بإيدك لحد ما تتماسك العجينة، مش طرية قوي ومش صلبة قوي.
- شكلي العجينة على حسب ما تحبي، ورصيها في صينية مدهونة بزيت مع مسافات بين الحبة والتانية.
- سخني الفرن على 180 درجة، وبعدين اخفضيه لـ 160 درجة وحطي الصينية في الرف الأوسط.
- لو الفرن بمروحة شغليه من فوق ومن تحت على 160 درجة.
- لو الفرن بدون مروحة شغليه من تحت بس على 160 درجة، ولما يتلون من الأسفل ارفعيه للشواية على نار هادية لحد ما يحمر الوجه.
- البسكوت مش محتاج حرارة عالية، النار الهادية هي سر اللون الموحد والجميل.
- اخبزي لحد ما ياخد البسكوت اللون الذهبي اللي بتحبيه.
بسكويت جوز الهند المقرمش
لا تحتاج ربة المنزل الكثير من المكونات لعمل بسكويت جوز الهند المقرمش، بل بمكونات متوافرة وبسيطة وفي وقت قصير للغاية يكون البسكويت جاهزًا للتقديم، ونعرض وصفة الشيف توتا مراد لـ طريقة عمل بسكويت جوز الهند المقرمش:
مقادير جوز الهند المقرمش
- نص كوب زبدة طرية
- نص كوب سكر بودرة
- بيضة صغيرة بدرجة حرارة المطبخ
- فانيليا
- كوب وربع دقيق
- نص كوب جوز هند
- نص معلقة صغيرة بيكنج باودر
طريقة عمل بسكويت جوز الهند المقرمش
1. اخلطي كل المكونات مع بعض بالترتيب المكتوب.
2. اعجني العجينة كويس واتركيها ترتاح شوية.
3. شكّلي العجينة على حسب ما حابة — البسكوت بيفرد بسيط مش كتير.
4. ادخليها الفرن على 180 درجة من 10 لـ 12 دقيقة بالكتير.
5. لما ياخد من تحت لون دهبي بسيط يبقى جاهز وهيبقى لذيذ جدًا.
