أحمد خالد أمين: أظهرنا معالم مصر الجميلة في مسلسل درش.. ومصطفى شعبان أحب الخروج من عباءة الصعيدي
كشف المخرج أحمد خالد أمين، كواليس تعاونه مع الفنان مصطفى شعبان في مسلسل درش، الذي ينافس به في الموسم الرمضاني الحالي، حيث أكد أمين أن صناع المسلسل حرصوا من البداية على إطهار معالم مصر، كما أن بطل العمل أحب التجربة حتى يخرج من عباءة الدراما الصعيدي.
وقال أحمد خالد أمين في تصريحات إذاعية له: تصوير مسلسل درش كان صعب جدًا، لأنه بين إسكندرية وبورسعيد والحسين والمعز وشبرا، وحاولنا بقدر الإمكان نصور في أماكن حقيقية، كنا حابين نظهر من خلال التصوير معالم مصر الجميلة، زي جامع بورسعيد، وجبال الملح، وكورنيش إسكندرية، وكوبري ستانلي.
واستكمل أحمد خالد أمين: قدمت السنة اللي فاتت مع مصطفى شعبان مسلسل "حكيم باشا"، وكان تجربة مختلفة لمصطفى شعبان، لأنه كان أول مرة يعمل دور الصعيدي، السنة دي الفكرة كانت إننا هنطلع من عباءة الصعيدي ونرجع للدراما الشعبية، لكن كان السؤال إزاي هنقدم الدور بشكل مختلف، خصوصًا إن مصطفى شعبان بقاله 17 سنة بيقدم دراما في رمضان؟، مصطفى شعبان من نوعية النجوم اللي فاهمين جدًا، لأنه اشتغل في إخراج الإعلانات.
وأضاف أحمد خالد أمين: لما اتكلمنا واتفقنا على "درش"، كانت الفكرة إننا نقعد الناس الـ29 يوم مش عارفين هو مين، وفي النهاية هيكون في إجابة منطقية لكل أسئلة الجمهور، السنة اللي فاتت كان في كيميا حلوة جدًا بين سهر الصايغ ومصطفى شعبان، سهر من خامة الممثلين اللي تقدر تلعب كل الأدوار، سواء شرير أو كوميدي.
واختتم: كل الممثلين المشاركين في المسلسل قيمتهم الفنية كبيرة جدًا، وهم ممثلين بدرجة نجوم، كل ما الكيميا بين التيم تكون حلوة، كل ما تلاقي الأدوار على الشاشة أحلى.
