إيداع المتهم بقتل زوجته في المنوفية بمستشفى الطب النفسي بالعباسية
قال المحامي أحمد حمد دفاع المتهم بقتل زوجته في المنوفية، إن محكمة جنايات شبين الكوم، قررت إيداع موكله مستشفى الطب النفسي بالعباسية، لبيان مدى سلامة قواه العقلية، بناءً على طلب الدفاع.
إيداع المتهم بقتل زوجته في المنوفية بمستشفى الطب النفسي بالعباسية
حصل القاهرة 24، على التحقيقات في قضية مقتل سيدة على يد زوجها، خنقا داخل منزلهما بمركز السنابسة بالمنوفية.
واستمع رجال التحقيق لأقوال المتهم، إذ قال: هو اللي حصل إني متجوز "س"، وخلفت منها أولادي، ودايما إحنا ومن ساعة ما اتجوزتها وإحنا مش بيعدي علينا وقت كويس وفي مشاكل بتحصل بنا كتير، وأنا اتكلمت معاها كثير ومع أهلها بس برده المشاكل فضلت مستمرة لحد إمبارح بعد ما عرفت من برة إنها كانت عاملة مشكلة مع واحد في الشغل هي وأختها.
وأردف: أنا رحت لأهلها حوالي الساعة 6:30، وقت أذان العشاء وقعدت مع أبوها وأمها وحكتلهم اللي حصل ورد أبوها إنه قالي دماغي بتوجعني وأمها قالت ريحنا منكم، فشربت معاهم الشاي وحجرين معسل قص وبعدين مشيت رجعت على البيت لقيت مراتي صاحية، فعاتبتها وقالتلي لو عاوز تطلقني طلقني وكان بقالها حوالي 50 يوم مانعة نفسها عني، وأنا طلبت منها بس هي مرضيتش .
وأوضح: بعدين رحت عملت الكوباية شاي ورحت فاتح باب الشقة وقاعد وهي كانت قاعدة في الصالة، وبعدين قالت لبنتي تقوم تغسل المواعين وبعدين غسلت المواعين، بنتنا هي اللي دخلت نامت بعدها، وبعدين كلمتني في موضوع المشاكل تاني وقالتي هي دي عيشتي وده وضعي والكلام ده كان حوالي الساعة 7، وراحت سخنت الماية ودخلت تستحمى وبعد ما استحمت طلعت قعدت تسرح شعرها ومسكت التلفون فضلت تلعب فيه وفضلت على كدا لحد الساعة واحدة ونص بليل.
وقال: على الساعة 2 بليل قولتلها يلا ننام بس هي منعت نفسها عني وأنا قولتلها لسة جايبك من بيت أهلك وماضيين إقرار وأنا مضيت علشان تيجي وتعمل كدا، وبعدين قولتلها ينفع تخلي أختك تشتمني النهارده شتمني بالأب.
وأردف: كلمة مني على كلمة منها قمنا مسكنة في بعض وهي مسكتني من الجلابية بتاعتي وأنا ضربتها على وشها وبعدين قمت مسكها بايدي الاثنين وحطيت لإيدي على رقبتها وزنقتها في الجدار وقمت حاطط ايدي على رقبتها حوالي 5 دقايق لحد ما خلصت ولما سبتها وقعت على الأرض، وأنا خرجت من البيت بعدها رحت على الغيط علشان المكنة بتاعتي كانت هناك، وأخدت المكنة وطلعت عند جوز أختي وبلغته باللي حصل وقالي روح سلم نفسك في المركز، وأنا رحت على المركز سلمت نفسي ودا كل اللي حصل.
