دياب: حب الأطفال لـ حجاج القط أكبر مفاجأة.. واللي يستحق لقب نمبر وان هو الجمهور| خاص

حقق دياب مؤخرًا نجاحًا كبيرًا وقت عرض مسلسل هي كيميا، تأليف مهاب طارق وإخراج إسلام خيري، والذي تصدر مشاهدات منصات السوشيال ميديا، كما تفاعل معه عدد كبير من الجمهور على المنصات والمشاهدين في المنازل.

دياب: حب الأطفال لـ حجاج القط أكبر مفاجأة 

وفي تصريحات خاصة لـ القاهرة 24 قال دياب: أنا لا أتوقع نجاح العمل اللي بقدمه ولكن بتمناه من ربنا، وبالتأكيد كل الناس اللي حواليا عملوا اللي عليهم سواء المؤلف أو المخرج وكمان شركة الإنتاج.

وعن سر اعتذاره عن أكثر من عمل قبل هي كيميا قال: بالفعل اعتذرت عن حاجات كتير قبل ما أتعاقد على مسلسل هي كيميا، ولكن اخترته لأنه جديد عليا وحبيت أقدم كوميديا جديدة، فضلًا على أن لم أتخوف من الكوميديا رغم أنها أصعب أنواع الفن، لأن كل أعمال الشر اللي قدمتها كان بيتخللها مشاهد كوميدية زي مسلسل فرصة تانية ومشهد الرقص في الفرح تريند إلى الآن، ونفس الأمر بالنسبة لـ مسلسل توبة ومنصور في أيوب، وبعتمد على الضحك من داخل الكراكتر.

دياب: مصطفى غريب من ألطف الناس

وأضاف: لم أعترض على تقديم عمل بطولة مشتركة مع مصطفى غريب، وفرحت بالعمل معاه على الشخصي والمهني لأنه من ألطف الزملاء اللي اشتغلت معاهم، والعلاقة دي كانت واضحة في العديد من المشاهد منها مشهد الفرح والدموع كانت حقيقية ودي كانت الروح اللي شغالين بيها طول المسلسل.

واستكمل قائلًا: مبحبش أكتب على السوشيال ميديا أنا الأكثر بحثًا وأكثر مشاهده لأن ده من دورنا، الكلام ده اللي بيحدده الجمهور والحاجات دي بتكون واضحة للناس وأنا ماشي بمبدأ اللي بيقول مبيعملش واللي بيعمل مبيقولش.

وعن حب الأطفال لـ شخصية حجاج القط قال: أعتقد الأطفال تعلقوا بـ حجاج القط لأنهم شافوه هيرو وحسه منه روح الأب والأخ الأكبر بجانب شعورهم أنه طيب القلب ودي كانت أكبر مفاجأة بالنسبة لي.

وعن خلافات الـ نمر وان قال: اللي يستحق لقب النمبر وان هو الجمهور اللي بيفرح وبيقف معانا لما بنقدم عمل كويس وبحب انتقاد الجمهور لما بنقدم عمل غير جيد.