فتحي عبد الوهاب: رد فعل الجمهور على سميح الجلاد شجعني أقدمه تاني
حقق فتحي عبد الوهاب، رد فعل واسع من خلال شخصية سميح الجلاد، التي قدمها في المداح 6، من تأليف أمين جمال وإخراج أحمد سمير فرج، وتفاعل الجمهور مع مشاهدة بطريقة كبيرة.
وقال فتحي عبد الوهاب في تصريحات خاصة لـ القاهرة 24: لما بعمل شخصية وبلاقي رد الفعل كويس بحبها، وحبيت شخصية سميح الجلاد وكل الشخصيات اللي قدمتها، وبعترض على أجزاء من العمل بسبب تكرار الشخصية، لأن أنا عايز أقدم شخصيات كثيرة، ومبحبش اتحدد في أدوار معينة.
فتحي عبد الوهاب: رد فعل الجمهور على سميح الجلاد شجعني أقدمه تاني
وأضاف: بالنسبة لـ سميح الجلاد حاجات كتيرة هي اللي جعلتني أقدمه تاني ومنها شركة الإنتاج اللي تواصلت معايا وأنا بصور ظلم المصطبة، وكنت شايف إن في ترحيب كبير من الجمهور، بالإضافة لعنصر مهم وهو الاجتماع اللي عملته مع أحمد سمير فرج المخرج، لأننا اتكلمنا في تطوير الشخصية والأدوات وأفكار كتيرة لتقديم الشخصية مرة أخرى، واعتمدنا على تناول درامي مختلف.
وتابع: الأهم إنك وأنت بتفكر مع المخرج والمؤلفين، أن يكون التحرك داخل السياق، فضلًا عن أن الصناع قدموا 150 حلقة، قدمت منها 30 حلقة وكان لازم يكون أفكار سميح الجلاد في الجزء الجديد مختلفة.
وعن تجسيده للشخصية، أوضح: أعتقد إن الناس بتشوف المكياج الخارجي لـ سميح الجلاد سواء في اللبس وطريقة الكلام وطريقة الحركة الناس بتشوفها أصعب، والمكياج الداخلي لـ سميح الجلاد صعب إن حد يقدر يحكيه، ولازم تكون مصدق والأهم أنك تكون مبسوط بالشخصية اللي بتقدمها.
وعن مشهد عبلة كامل في ريا وسكينه قال: رد فعل عبلة كامل في المشهد جعل عقلي يتوقف عن التفكير، وهى موهبة عظيمة.
وعن نجاح جميع أجزاء المداح قال: أعتقد الموضوع مرتبط بالفلكلور الشعبي والمواضيع دي متوفرة جدًا في الأقاليم والأرياف بالإضافة لـ فكرة الاكتمال الفني، والأساس إن أحمد سمير فرج عارف الجمهور المستهدف وعارف هو عايز إيه وده جزء مهم من النجاح.
