مباراة للنسيان│ ميدو يعلق على خسارة الزمالك أمام إنبي.. ويوجه نصيحة للاعبي الأبيض
علق أحمد حسام ميدو نجم ومدرب نادي الزمالك السابق على خسارة الزمالك أمس أمام إنبي، في لقاء مؤجل من الجولة الـ 15 لبطولة الدوري الممتاز.
وعبر حسابه على منصة X نشر ميدو تغريدة قال فيها: مباراة للنسيان لـ الزمالك لم نبدأ بأفضل تشكيل وكان يجب الصبر على محمد السيد إلى ما بين الشوطين ونزول أدم كايد بدلا منه في الوقت اللي إنبي لعب بكثافة دفاعية كنا محتاجين لاعيبه تعرف تستلم الكورة بين الخطوط وتعمل مشاكل لدفاع إنبي.
وأضاف ميدو: نزول عدي الدباغ فصل الثلاثي الهجومي عن وسط الملعب فبقت مهمة حمزة الجمل اللي عمل ماتش كبير سهلة جدا وهي قفل الاجناب على الزمالك لقتل خطورته.
وواصل ميدو حديثه في تغريدة أخرى قائلا: مهما كنت مين ولو اكبر فرقة في العالم في أيام بتبقى مش بتاعتك ضربة جزاء في توقيت صعب والمهدي راح مع الكورة لو يومك هيصدها ويجيلك ضربة جزاء تطلع على الأقل بنقطة أحسن لاعيب بيشوط ضربات جزاء في مصر يضيعها.
واستكمل ميدو موجها نصيحة للاعبي الزمالك قائلا: لازم نقفل الصفحة ونلعب 6 ماتشات كلها ماتشات كؤوس لازم يبقى في هدوء أكثر، وتعرف ان الفترة الجاية كل منظومة الكورة في مصر هتصدرلك كل المشاكل اللي ممكن يصدروهالك..اقفل ودنك لازم تعرف ازاي تتعامل مع الخسارة لأنها جزء من اللعبة خسرنا وممكن نخسر ثاني.. علشان كده بطل الدوري لازم يكون نفسه طويل وبيعرف يتعامل مع الأزمات.
