محمد سليمان: زوجتي اعتنقت الإسلام عن اقتناع.. و«القائمة» أسوأ ما في المجتمع
كشف الفنان محمد سليمان كواليس زواجه، من سيدة على غير ديانته، كما تحدث عن استغنائه عن مبدأ “القايمة” أثناء زواج ابنته صوفيا، وعدم حصوله على مهر من زوجها.
وقال الفنان محمد سليمان خلال تصريحات تليفزيونية: مفيش إكراه في الدين، إحنا اتجوزنا وهي مسيحية وأنا مسلم، وابتديت أشرح لها ديني وعاداتي، هي كانت بتسأل وأنا بجاوب، ومع الوقت هي حبت الثقافة بتاعتنا واعتنقت الإسلام عن اقتناع مش عشان ورق وشهر عقاري.
تصريحات محمد سليمان
وأكد الفنان محمد سليمان أنه يوجد فرق بين المرأة المصرية والبرتغالية، قائلًا: الست هي الست، بس الفرق في النظام، الست الأوروبية منظمة جدًا وماشية بجدول، المصرية ساعات بتمشي بالبركة والدنيا بتبقى ملخبطة شوية، التعليم في أوروبا بيطلع الشباب عندهم مسؤولية من صغرهم، لما يقولوا كلمة بينفذوها.
ورد الفنان محمد سليمان على جدل ارتداء ابنته للحجاب وأيضًا زواجها بدون مهر، قائلًا: أنا مسلم وبنتي مسلمة، ليه الناس فاكرة إن الفنان وعيلته لازم يكونوا مش متدينين؟ ومع ذلك، الحجاب كان قرار بنتي الشخصي 100%، أنا فرحت طبعًا، بس قلت لها لو لبستيه مينفعش تقلعيه، لأن التردد بيكسر الشخصية، بنتي التانية مش محجبة بس بتصلي وصايمة وملتزمة جدًا.
واستكمل حديثه: أخدت جنيه واحد مهر من زوج بنتي، المهر المليون جنيه مش هيضمن إن اللي داخل ده ابن ناس، أنا أخدت (جنيه واحد) مهر واشتريت راجل، والقايمة دي (شيء قميء) وأسوأ حاجة في المجتمع المصري، بقت بيزنس عشان نحبس الرجالة على كلام فارغ، الرسول عليه الصلاة والسلام معملش قايمة، واللي يضمن إنها تنقي راجل صح، راجل يعرف ربنا ومثقف ومحترم، الأهل بيتسرعوا في الجواز عشان خايفين البنت تبـور، لكن لازم نغير الثقافة دي ونربي أولادنا على المسؤولية من صغرهم.
