أسامة نبيه: لو رجع بيا الزمن مش هوافق على رحيل ابني من الزمالك
كشف أسامة نبيه نجم نادي الزمالك ومنتخب مصر الأسبق، عن تلقيه دعوة إفطار من جماهير القلعة البيضاء اليوم بعد انتهاء الأزمة بينه وبينهم.
تصريحات أسامة نبيه
وقال أسامة نبيه، في تصريحات إذاعية: الجمهور عندهم حق وكانوا زعلانين بسبب رحيل يوسف ابني عن نادي الزمالك، ومهما قلت قصة الموضوع ده، فيه تفاصيل كتير لكن مش هتوصل زي ما أنا عايز.
وأضاف أسامة نبيه: يوسف عقده انتهى، وحاولت أتكلم مع المسؤولين قبل فترة الفراغ الإداري اللي حصلت، وقلت إن عقده مش مناسب ليه، والعرض اللي اتقدم لنا كان ضعيف، بس ملقتش أي رد فعل، وجمهور الزمالك زعل مني، بس الحمد لله بعتولي دعوة فطار اليوم في المريوطية، والحمد لله رايح.
وتابع نجم نادي الزمالك السابق: ابني ليه وجهة نظر وليه شخصية، بيشاركني الرأي بس القرار في النهاية هو اللي بياخده، ولو رجع بيا الزمن مكنتش هوافقه في الرحيل عن الزمالك، لكن قدر الله وما شاء فعل، لسه الكورة فيها كتير، واللي بينا وبين الزمالك كبير.
واختتم أسامة نبيه: أتمنى يوسف يرجع الزمالك، ولازم يشتغل على نفسه ويرجع يوسف بتاع زمان، وعنده الفرصة حاليا في زد عشان يرجع تاني.
