سِحر القلوب
• هيفضل سحر الكلمة وتأثيرها هو السحر الحلال واللي مش محتاج لساحر عشان يعمله.. مجرد اختيارك للكلمة اللي بتخرج منك، ومرورها لمدة ثانيتين بس قبل نطقك بيها كفيل إنه يغير نفسية غيرك من حال لحال.. في قسم القصص الإنسانية في جريدة "نيويورك تايمز" المواطنة الأمريكية "جانيت ليزفيسكي" بتحكي إنها اتجوزت وجوزها ماكنش عايز أطفال بس هي صممت وخلفت.. لما حصلت الخلفة جوزها طلقها وسابها هي وبنتها.. خلفت بنوتة جميلة اسمها "أريانا" وكانت مولودة بـ تقوس في رجليها.. في مرحلة الحبو بتاعت البنت كانت "جانيت" تقف بعيد عنها وتفتح دراعاتها وتناديها: (تعالي).. "أريانا" تحبي لحد ما توصل لـ أمها وتشد طرف هدومها فتشيلها وترفعها وتسألها: (هل أنتي إبنتي؟).. "أريانا" تهز راسها بالموافقة.. "جانيت" تسألها: (هل أنتى إبنتى الحبيبة إريانا؟).. "أريانا" تهز راسها بالموافقة تاني بس مع الهزة إبتسامة.. "جانيت" تقول: (وأنا أحبك دائمًا وأبدًا ومهما كلفني الأمر).. استمرت بينهم اللعبة اللطيفة دي لحد ما "أريانا" بقى عندها 4 سنين ونص، وفي يوم "جانيت" كان عندها ضغوط في شغلها وغتاتة من المديرة بتاعتها ومصاريف البنت اللي هتدخل الحضانة مش معاها واكتشفت إنها غالية عليها لوحدها.. ضغوط ضغوط ضغوط من كل ناحية.. لحظة من لحظات الضعف الإنساني الطبيعية واللي الكل بيحس بيها خصوصًا لما تكون وحدك ومحتاج حد ياخد بحسك.. وصلت البيت وهي خلاص هتنفجر فجريت على الأوضة بتاعتها واترمت على سريرها وانفجرت في البُكا بحرقة.. شوية ولقت الباب بيتفتح بالعافية و"أريانا" واقفة على طرف الأوضة وفاتحة دراعاتها وبتقول لها: (تعالي).. "جانيت" متحركتش من مكانها.. "أريانا" قربت منها وهي بتمشي بالعافية بسبب رجليها لحد ما بقت جنبها وحطت كف إيدها الصغيرة على وش أمها وقالت لها: (هل أنتي أمي؟).. "جانيت" وسط دموعها هزت راسها بالموافقة.. البنت سألتها تاني: (هل أنتي أمي الحبيبة الجميلة؟).. الأم هزت راسها بالموافقة تاني وهي بتحاول تبان جد وبتكافح عشان تكتم ضحكتها من وسط دموعها.. البنت قالت بتهتهة حلوة: (وأنا أحبك دائمًا وأبدًا ومهما كلفني الأمر).. أمها محستش بنفسها إلا وهي حضناها وغرقوا في الضحك.. تاني يوم رجعت الشغل وهي مش فاكرة أي حاجة من القرف بتاع إمبارح ومش فاكرة بس إلا كلمتها اللي بعد كده بقت كلمة بنتها: (وأنا أحبك دائمًا وأبدًا ومهما كلفني الأمر ).
•هي الكلمة والله وما فيه غيرها.. لو اتقالت لك من القلب ممكن تطلع لك جناحات وبراح الكون مش هيساعك من الفرحة، ولو اترمت في وشك بدون دم ولا إحساس وبمنتهى الجليطة قادرة تسم البدن وتجيب إكتئاب وارد يجيب موت.. بمنتهى السهولة ممكن تكسب أى حد أو تخسره بـ "كلمة" على حسب اتقالت إمتى ؟، مين قالها؟، والنبرة اللي اتقالت بيها؟.. لما بيسألوا الفنان "أحمد زكي" عن مفتاح شخصيته قال: (أى كلمة حلوة خارجة من القلب قادرة تفتح قلبي).
