الإرهابي علي عبد الونيس يوجه رسالة لـ نجله: الدنيا ماتستاهلش تضيع نفسك عليها.. والوقفة قدام ربنا صعبة
تمكنت الأجهزة الأمنية من تتبع تحركات أحد أبرز العناصر القائمة على المخطط المشار إليه بالخارج القيادي الإخواني الهارب علي محمود محمد عبد الونيس، والمحكوم عليه بالسجن المؤبد في عدة قضايا إرهابية، أبرزها القضية رقم 120 لعام 2022 جنايات عسكرية (محاولة استهداف الطائرة الرئاسية)، واغتيال الشهيد المقدم ماجد عبد الرازق، واستقدام القيادي الإخواني الهارب من إحدى الدول الإفريقية.
اعترافات الإرهابي علي محمود محمد عبد الونيس
وخلال اعترافات الإرهابي على عبد الونيس وجه رسالة ندم إلى زوجته: "اهتمي بتربية ابننا تربية صحيح وعلى الإسلام الصحيح، ما تنضمش لأي تنظيمات ولا أي مؤسسات ولا أي فكر غير صحيح، ما تنضمش لأي حاجة ولا تخليه ينضم لأي تنظيمات ولا أي مؤسسات هو الإسلام، الإسلام كفاية يعني.
ووجه رسالة لابنه محمد لو شوفت ابني هقول له خلي بالك من نفسك، نفسك غالية فمضيعهاش في الفاضي، وماتضيعهاش في حاجة، ماتستاهلش، كل الدنيا ماتستاهلش إن إنت تضيع نفسك عليها، لا حكم ولا سلطة ولا حرب بين بين كرسي ولا أي حاجة، مفيش حاجة تستاهل إن إنت تضيع نفسك عليها، وحافظ على نفسك وحافظ على أمك وراعي ربنا في حياتك كلها، وما تعملش حاجة حرام، لأن الوقفة قدام ربنا صعبة، محدش فينا، محدش فينا يستحمل الوقفة قدام ربنا، فلازم تكون مستعد للوقفة دي أو لليوم ده.
واستكمل الإرهابي في اعترافاته: "يعني أنا بدعي ربنا يسامحني والله، أنا بدعي ربنا يسامحني وبطلب من كل اللي بيحبوني إن هما يدعولي إن ربنا يسامحني على أي حاجة غلط أنا عملتها في حياتي، وعلى أي دم حرام أنا شاركت فيه ولا دعيت ليه ولا حتى دربت حد علي، يعني مفيش حد بيبقى جاهز يقابل ربنا وهو عامل ذنوب ولا وهو حتى مشارك في دم ولا أي حاجة، دم دي كبيرة جدًا، يعني كبيرة جدًا عند ربنا دم أي حد يعني أنا شاركت فيه سواء بعلم أو بدون علم أو بقصد، فأنا متحملش أقف قدام ربنا بيه ماقدرش أقف قدام ربنا بيه عشان خايف من حساب ربنا طبعًا".
