الأمير صديقي

المسؤولية حِمل تقيل فيه اللي بيتولد بيها وبيكون قد الحِمل وقد مسؤوليته وفيه اللي بتتفرض عليه المسؤولية ويا إما بيشيلها برجولة يا إما بينخ.. عشان كده عندي قناعة كاملة إن مفيش إنسان خلقه ربنا بيمر على الدنيا بدون ما يتكتب له في صفحة من صفحات حياته جزء من شيلة تقيلة تقدر بمنتهى السهولة تختبر من خلالها رجولته، جدعنته، ولأي درجة ينفع يُعتمد عليه.

الفكرة إن الموضوع له علاقة بالتربية.. مش هتعرف تشيل مسؤولية غيرك أو حتى مسؤوليتك غير لما تتربى على كده.. تشوفهم في البيت عاملين كده فتقلدهم، أو يعلموك بشكل مباشر إنك تكون مسؤول، وبرضه بالتبعية لأي درجة أنت عايز ولادك يطلعوا عاملين إزاي فهتربيهم إزاي!.. القاعدة العامة بتقول إن اللي بتزرعه في أولادك من صغرهم هتبقى هي النسخة اللي هيكبروا عليها وبيها هيعاملوا الناس ويا إما هيكونوا عوض ليهم، يا إما هيكون وجع ودرس مايتنسيش وسبب لعقد هيعقدوا بيها خلق الله وطبعًا هينوبك من دعواتهم نصيب لإن أنت السبب في النموذج اللي بهدل حياتهم ده.

عشان كده عندي احترام لا محدود لكل شخص، أو بيت بيقرر يربي صح.. هتربي صح النهاردة يبقى هتخدم الناس صح بكرة.. عمري ما أنسى "أحمد الأمير" صديق عمري الي قررت والدته -الله يرحمها- من زمان إنها تربيه صح.. رغم إننا وإحنا صغيرين كنا عايشين في مجتمع صعيدي شِبه منغلق إلا إن والدته كان عندها عادة حلوة جدًا بتعملها معاه وهو عنده 9 سنين تقريبًا.. لما كان يحب يشتري لبس أو شوز كانت تخرج معاه زي أي أم عادى جدًا.. بس تخليه هو اللي يدخل المحل ينقي ويشتري ويفاصل ويحاسب وهي تنتظره بره!.. يمكن الموقف ده كان حاجة أساسية مع حاجات كتير حفرت جواه من صُغره أسلوب حياة خلّاه بعد كدة يسافر أمريكا وهو لسه في أوائل العشرينات ويعافر مع ظروف أرخم وأرذل هناك فكانت النتيجة: راجل بمعنى الكلمة.

المسؤولية مش اختبار بييجي فجأة، وننجح فيه بالصدفة!.. دي عضلة بتتبني يوم ورا يوم، وموقف ورا موقف من وإحنا صغيرين لحد ما نبقى قدّام اختبارات بجد.. المسؤولية مش صوت عالي، ولا منظر قدام الناس لكن إنك تبقى موجود وقت الجد، ثابت وقت الهزة، ومش بتدوّر على حد يشيل بدالك.. الحكاية كلها إنك يا إما بتتربى تبقى ضهر، يا إما بتتربى تبقى حمل على ضهر غيرك.. والمعادلة بسيطة جدًا: اللي اتعلم يشيل وهو صغير، محدش هيقلق عليه وهو كبير.. فلو أنت شايل دلوقتي كمّل، لأنك بتتربى صح حتى لو محدش ربّاك.. ولو بتربي خلي بالك أنت مش بتربي عيل لكن بتجهّز راجل أو ست هيتشال بيهم ناس تانية.. في النهاية ربنا إذا كلَّف أعان.. لو اختار لك الطريق الفلاني، فإمَّا هييسره لك، أو هيعينك عليه.