صاحبة شكوى منع نجلها من دخول الحمام بأحد المدارس الأزهرية الخاصة: فصلوا المِس.. والمسؤولون عن الواقعة أحيلوا للتحقيق
كشفت ولية أمر طالب بأحد المدارس الأزهرية الخاصة بالإسكندرية، وصاحبة شكوى منع معلمة لنجلها من الذهاب إلى الحمام خلال الحصة، أنه تم فصل المعلمة بعد الواقعة.
وأضافت عبر أحد الجروبات على السوشيال ميديا: الشكاوى اللي قلت هسحبها هي الخاصة بنجدة الطفل.. ولكن طبعا مش الخاصة بالإدارة التعليمية لأني لو سحبتها يبقى بلغي العقوبات.. غالبا فيه ناس فهمت غلط أو التبس عليها الموضوع لأني كنت مقدمة شكاوى في أكتر من جهة.. هكتفي فقط بالجهات التعليمية والإدارية عشان هما اللي منوط بيهم محاسبة ومعاقبة المسؤولين.. وهتنازل عن الشكاوى المتقدمة بخصوص حقوق الطفل لأن ببساطة خلاص المدرسة اتعاقبت.
وتابعت: بخصوص العواقب اللي الناس حابة تعرفها، المس اللي عملت كده مع ابني تم فصلها تماما، والمسؤولين اللي في المدرسة كلهم بلا استثناء اتعرضوا للتحقيق وثبت إدانتهم، لكن بناء على رجاء شخصي من حد فيهم عزيز جدا وليه كل الاحترام هو طلب إني مكتبش بالتفصيل إيه اللي حصل معاهم وأنا محترمة ده، لكن كل أنواع العقوبات نزلت على المدرسة والإدارة من جزاءات وإحالة للشؤون القانونية وفصل وكل حاجة.. والحمد لله أنا اتراضيت وزيادة أوي أنا وابني لكن صعب أكتب كل فرد اتجازى بإيه بالظبط.
وواصلت: هيتم تشكيل لجنة من الوزارة لمتابعة المدرسة بشكل أسبوعي وتقييم أداء المديرين والمدرسين، وإعادة تقييم جميع المعلمين والمعلمات داخل المدرسة من أول وجديد.
