بيفبرك صور ومحادثات.. فتاة تزعم ابتزاز خطيبها السابق لها على وسائل التواصل: دمر حياتي

زعمت فتاة تعرضها للابتزاز من خطيبها السابق، وفبركته صورًا شخصية لها ونشرها بحسابات غير حقيقية عبر منصات التواصل.

فتاة تزعم ابتزاز خطيبها السابق لها على وسائل التواصل

وقالت الفتاة في تصريحات خاصة لـ القاهرة 24: لما فسخت خطوبتي اتفاجئت إن خطيبي السابق سارق صوري من على موبايلي من خلال تهكير تليفوني.

وتابعت: بدأ يهددني بالصور دي اللي خدها من عندي وكنت بتعرض لابتزاز من ساعة ما بعدنا عن بعض، وبيبعتلي تهديدات من حسابات مش حقيقية، عرفت إنه بيعمل كده من تليفونات تانية مش تليفونه الشخصي، كل هدفه إنه يكسر عيني عشان معرفش أرتبط بحد تاني وكان بيقولي محدش هيرضى يرتبط بيكي بسبب الصور دي.

وأضافت: ياريت الموضوع خلص عند الصور والمحادثات، ده آخر مرة هددني إنه هيرمي على وشي مياه نار ويموتني.

وذكرت: بسبب تهديداته ليا بصوري قفلت كل حساباتي الخاصة بـ السوشيال ميديا وكان بيجيلي شغل كتير عليها، دلوقتي معنديش أي حساب، وكل ما يعرف إني ارتبطت بحد بيكلمه ويشوه سمعتي قدامه.
 

وأوضحت: راح لأخويا عند شغله وضربه ولولا ستر ربنا كان هيموت، أنا حياتي اتدمرت بسبب اللي بيعمله ونفسي ألاقي حل.