وجع مُثمر

سنة 1997 الكاتب "فيليب جالي" كتب قصة عن درس اتعلمه من جاره الطبيب د. جيبز الراجل العجوز اللي كانت حياته متقسمة بين إنقاذ حياة الناس من خلال الطب وبين الزراعة..  د. جيبز كان عنده أرض زراعية مكونة من 10 فدادين بيراعيهم فدان فدان وشجرة شجرة، بس كان عنده مبدأ غريب في التعامل مع النباتات.. لو مثلًا الشجرة المفروض تتسقي أربع مرات في الأسبوع.. لأ هو كان يسقيها مرتين بس!.. رغم إن ده كان ضد أبسط قواعد الزراعة اللي اتعلمها فيليب إلا إنه ماقدرش مايسألش د. جيبز عن سبب تصرفه وإيه فلسفته في الموضوع الغريب ده.

د. جيبز رد عليه وقال: لا ثمر بلا ألم.. فيليب مافهمش الإجابة فطلب منه يفسر أكتر في رد عليه بما معناه إن كترة سقاية الأشجار عمّال على بطال بتخلي الجذور مش قوية وضعيفة وأي شوية هوا هيطيروهم لكن الأشجار اللي مش بتتسقي على طول وبقدر بسيط بتضطر تمد جذورها في عمق الأرض عشان تدور على مصدر تاني للمياه فبالتالي بتبقى أكثر ثباتًا في الأرض.

فيليب بان على وشه عدم الاقتناع برضو من الإجابة ومارضيش يحرجه أكتر من كدة وقال بينه وبين نفسه وأنا مالي هو حر يعمل اللي يعمله.. بعدها بفترة د. جيبز زرع شجرتين بلوط وكان متعود كل يوم الصبح يجيب جورنال ويلفه على شكل أسطوانة ويضرب بيه الشجرتين ضربات متتالية!.. فيليب شافه.. ماقدرش يسيطر على فضوله للمرة التانية.. راح وسأله فرد د. جيبز عليه: قد يبدو لك أنني أضربها لكن حسب آخر الأبحاث العلمية في مجال الزراعة فتلك الضربات تحفظ انتباه الشجرة!.

الكاتب فيليب بيقول إنه هو كمان كان في نفس التوقيت بيزرع شجرتين في جنينة بيته اللي جنب بيت د. جيبز.. تمر الأيام ويموت د. جيبز.. تمر الأيام أكتر وتحصل عاصفة قوية تشيل الشجرتين بتوع فيليب بسهولة ويفضلوا الشجرتين بتوع د. جيبز زي ما هما!.. والسبب؟.. جذورهم القوية.. وقتها فهم فيليب الدرس اللي علمهوله د. جيبز وفهم إن فعلًا لا ثمر بلا ألم.

 الأيام اللي بتبان قاسية أو ناشفة هي في الحقيقة فرصة عشان الواحد يكتشف صلابة معدنه اللي ماكنش هيبان أبدًا طول ما الدنيا أمان.. عشان كده متخافش من الضغط ولا تندم على اللحظات الصعبة لإن الراحة عمرها ما صنعت بطل، ولا السهولة خرّجت حد يقدر يسند نفسه لما الدنيا تميل.. كل تعب بتتحمله، وكل وجع بتعديه النهاردة هو اللي بيثبتك في الأرض أكتر بكره.. الألم مش عدو، ده أوقات كتير بيكون هو الطريق الوحيد عشان تنضج، وتتحول لشخص عاصي على الكسر مهما كانت قوة العاصفة.