ميدو: منظومة التحكيم بتحارب بعضها.. وبلاش سيد عبد الحفيظ يتصدر المشهد
انتقد أحمد حسام ميدو نجم الكرة المصرية السابق، مستوى التحكيم في الكرة المصرية خلال الفترة الأخيرة، مؤكدًا أن الأخطاء التحكيمية أصبحت ظاهرة متكررة دون وجود تطوير حقيقي في أداء الحكام.
تصريحات أحمد حسام ميدو
وقال ميدو خلال تصريحات تليفزيونية، إن نسبة كبيرة من مباريات الدوري تشهد قرارات تحكيمية خاطئة، مشيرًا إلى أن الأخطاء باتت تؤثر بشكل واضح على نتائج المباريات.
وأضاف ميدو: الأخطاء التحكيمية زادت بشكل كبير في الفترة الأخيرة، ومفيش تطوير حقيقي للحكام، وحوالي 70% من مباريات الدوري فيها قرارات تحكيمية خاطئة، وده رقم كبير جدًا يوضح حجم المشكلة، ولازم التحكيم المصري يبقى ليه وقفة حقيقية، لأن الوضع الحالي مش مقبول.
وتابع ميدو تصريحاته قائلًا: فيه حكام كتير بعد ما بيعتزلوا ضميرهم بيصحى وعائلة التحكيم المصري نفسها فيها صراعات، وكل واحد بيحارب التاني.
وفي سياق منفصل، وجه أحمد حسام ميدو رسالة إلى سيد عبد الحفيظ عضو مجلس إدارة النادي الأهلي، مؤكدًا أن تصدر المشهد بشكل مستمر قد ينعكس سلبًا على أي مسؤول داخل المنظومة الكروية.
وقال ميدو عبر برنامجه: لو يسمحلي الكابتن سيد عبد الحفيظ إني أنصحه، مش لازم تكون إنت دايمًا متصدر المشهد لوحدك، لأن ده في الآخر بيحرقك، وواحد من أهم أسباب رحيلك في فترتك السابقة مع الأهلي إنك كنت متصدر المشهد لوحدك، وده بيخلي كل الضغط عليك.
وتابع: متخليش حد يطلعك المسرح لوحدك، لأنك كده بتخدم ناديك آه، بس أنت أول واحد بيتحرق قدام المسؤولين، مش قدام الجمهور، ومع كل موقف بتاخده لوحدك، ومع تكرار الأزمات، بيتكون عنك انطباع إنك أنت سبب المشاكل، وإن غيابك ممكن يقللها.
واختتم ميدو تصريحاته قائلًا: أنا عارف بقول إيه كويس، لأني وقعت في نفس الغلطة دي قبل كده، مرة واتنين، وعشان كده بقولك متتصدرش المشهد لوحدك.
