المطربة فريدة عبيد: أنا دمرت نفسي ومش عارفة أعيش
كشفت المطربة فريدة عبيد عن تفاصيل أزمتها الأخيرة، مؤكدة أنها تعرضت لمشكلات أثرت عليها وعلى أسرتها بشكل كبير، وسط حالة من الضغوط النفسية التي تمر بها خلال الفترة الحالية.
وقالت فريدة عبيد خلال لقائها مع القاهرة 24: معرفش حد في الوسط، وفيه ناس استغلت طيبتي، وأنا دمرت نفسي بإيدي.
وأضافت فريدة عبيد: أنا شغالة في حالي وعندي موهبة عايزة أقدمها للناس بكل حب واحترام، ومش عايزة أقدم حاجة وحشة، أنا إنسانة مسؤولة، ومش عايزة أعمل أغنية فيها كلام مبتذل، علشان طفلة صغيرة تسمعها ما تتعلمش حاجة غلط، أنا براعي ربنا في شغلي، وفيه ناس بتقول الفن حرام، لكن أنا مش شايفة كده.
وأردفت فريدة عبيد: أنا مش عارفة أعيش، ومعنديش أي ملجأ غير الناس تساعدني أخرج من اللي أنا فيه، علشان تعبت.
فريدة عبيد ترد على منتقدي شكلها: اعتبروني مطربة وحشة بس صوتها حلو
وفي وقت سابق، وجهت المطربة فريدة عبيد رسالة حازمة للمتنمرين على شكلها، وذلك بعد ظهورها مؤخرًا في برنامج هي وبس مع الإعلامية رضوى الشربيني.
ونشرت فريدة عبيد عبر حسابها الرسمي على فيس بوك: كل اللي بيتكلم ويتنمر على شكلي مريض بجد وعايزة أعرفكم معلومة صغيرة: أنا في البرنامج ده علشان موهبتي وأغنيتي اللي كتبتها ولحنتها وغنتها ونجحت والناس حبتها، مش علشان أنا بنت شكلها حلو.
وأضاف: وعلشان أريحكم، اعتبروني مطربة شكلها وحش بس صوتها حلو، لو أنتو مش مستوعبين إن كاميرا الموبايل مش بتجيب الشكل مظبوط زي كاميرا التليفزيون، والإضاءة والميك آب واللبس والشعر كل ده بيعمل تغيير في الشكل، يبقى دي حاجة ترجعلكم، أو تقريبا انتو ما بقيتوش قابلين تشوفوا ناس طبيعية وبسيطة مش متكلفة في ظهورها.
وأضافت: عمومًا، زي ما قلت لكم، اعتبروني مطربة صوتها حلو بس شكلها وحش لو ده هيريحكم أنا عن نفسي مرتاحة في شكلي ومتقبلة في كل الأحوال أنتو إيه مدايقكم مش فاهمين وليه أصلًا مركزين في شكلي!.
