أحمد شديد قناوي: جوزيه قالي هو ده جسم ظهير أيسر؟.. واللاعب في الوقت الحالي كل همّه الفلوس

كشف أحمد شديد قناوي لاعب الأهلي الأسبق كواليس لقائه الأول مع البرتغالي مانويل جوزيه المدير الفني البرتغالي التاريخي لـ الأحمر، مع حديثه عن رأيه بخصوص الماديات التي تُقال في الفترة الحالية لـ لاعبي الفريق.

تصريحات أحمد شديد قناوي

وقال أحمد شديد قناوي في تصريحات إعلامية: مانويل جوزيه أول ما شافني قالي إنت جاي تعمل إيه؟.. بتلعب ايه؟ قولتله تحت المهاجم.. قالي هتلعب مكان مين! أبو تريكة ولا مين يعني؟.. قولتله أنا عادي يعني إنتو جايبيني من المنيا.

وأضاف: مانويل جوزيه قالي أنا مش عايز لاعب تحت المهاجم.. قولتله بس الإدارة جايباني ظهير أيسر.. فـ راح قالي وهو ده جسم ظهير أيسر؟!.. قولتله لأ طب شوفني في الملعب.. قالي لأ انزل مع الناشئين، بس أنا روّحت بقا.

وأشار أحمد شديد قناوي في تصريحاته: جيت الصبح تاني يوم، فـ راح قالي إيه اللي جابك تاني قولتله عشان أنا عايز ألعب حلمي ألعب في الأهلي طب شوفني أنا مش هعرف أرجع بلدنا.

وأكد: الكورة مفيهاش كرامة، دوس على نفسك وعافر، مفيش مشكلة، وقولت لـ جوزيه الجيل الذهبي مكنوش معروفين وأنا مش معروف فـ جربني إيه المشكلة؟، راح مانويل جوزيه دخّل كل اللاعبين غرفة الملابس عشان ميحرجنيش، وجاب أشياء التمرين، وعلمني مركز الظهير الأيسر في يومين فقط.

وأردف: حسام البدري قالي قبل الماتش الودي أمام الفريق البرتغالي “يا هتكمّل معانا يا هتروّح بلدكم”، فـ جوزيه قال لـ أسامة عرابي قول لـ شديد قناوي قدامه 5 دقائق وهطلّعه، وأنا الحمد لله أمي دعواتها كانت كبيرة في اليوم ده، وسجلت هدف، وروحت لمانويل جوزيه حضنته.

وعن لاعبي الجيل الحالي، أفاد أحمد شديد قناوي في تصريحاته: لما تديني 70 مليون وتقولي تعالى التمرين بكرة مش هاجي.. إنما لما تديني 10 وتقولي الباقي مرتبط ببطولات ومشاركات وإنجازات ساعتها هبذل أقصى ما عندي عشان أخد مستحقاتي الباقية.. اللاعيبة دلوقتي هدفهم هو الفلوس وخدوها في أول الموسم خلاص.