مش هتعامل معاه تاني.. ابنة نجيب محفوظ: تصريحات عمرو سعد تسيء ليا ولو عنده عقد اللص والكلاب ينشره
أعربت ابنة الأديب الراحل نجيب محفوظ، عن استيائها الشديد بسبب أزمة رواية اللص والكلاب، وتصريحات الفنان عمرو سعد، بحصوله على حقوق الرواية وإعادة تقديمها في عمل سينمائي، موضحة أنه كان هناك بينهما عقد بموافقة مبدئية لمدة عامين على روايتي اللص والكلاب وأولاد حارتنا عام 2020، مؤكدة أن مدة الموافقة انتهت وأن التعاقد الرسمي كان على أولاد حارتنا رفقة المنتج صادق الصباح وعمرو سعد.
وقالت ابنة نجيب محفوظ، في تصريح خاص لـ القاهرة 24: الأستاذ عمرو سعد سببلي مشكلة وادعى أن عنده حقوق اللص والكلاب وده مش صح، ده شيء يسيء ليا أني بدي الحقوق لأشخاص متعددة في نفس الوقت، سنة 2020 كان فيه موافقة مبدئية ومن الشرط أنه يجيب منتج أوافق عليه، وقتها جاب المنتج صادق الصباح ولولا وجوده مكنش أخد حقوق رواية أولاد حارتنا.
وأضافت ابنة نجيب محفوظ: متكلمش على اللص والكلاب، وحتى لو عملت عقد المدة انتهت لأنها كانت عامين فقط، لو عنده عقد حقوق اللص والكلاب ينشره، هو زعل أني بنشر الحقيقة أن مريم نعوم اللي معاها الحقوق وده شيء مؤسف، عندي تحفظات من وقت ما تعاملت معاه وقررت أني مش هتعامل معاه مرة أخرى.
ابنة نجيب محفوظ وأزمة اللص والكلاب
وكانت أوضحت ابنة الأديب الراحل نجيب محفوظ، في تصريح خاص لـ القاهرة 24، أن الفنان عمرو سعد، لم يتواصل معها للحصول على حقوق رواية اللص والكلاب، موضحة أنها تنازلت عن حقوق الرواية لـ المؤلفة مريم نعوم، قائلة: أنا اعتقدت أن عمرو سعد حصل على حقوق الرواية من الأستاذة مريم، ولكنها اتصلت بي ونفت الموضوع، وهو لم ياخذ أي حقوق مني، كيف أبيع الحقوق مرتين قبل انتهاء مدة العقد؟.
عمرو سعد يعلن إعادة تقديم اللص والكلاب
وفي سياق آخر، كشف الفنان عمرو سعد، عن رغبته في إعادة تقديم فيلم اللص والكلاب، قائلًا في تصريحات إذاعية: هعمله فيلم وخدت الحقوق، مش خايف لأن دي بتحصل في أمريكا، والموضوع كله في نجيب محفوظ وأنت تقدر تعيد عمل ناجح وينجح تاني وده بيحصل في العالم كله بالتقنيات الحديثة، تخيل لو عملت مطاردة بالشكل والتسريحة بالتقنيات بتاعة دلوقتي في مصر هتبقى خطيرة.
