كنت هبيع دبلة زوجتي.. شاب يوثق مساعدة أصدقائه له للحصول على دبلومة بدلا من بيع خاتم زواجه
وثّق شاب عبر حسابه على فيسبوك منشورًا عن حصوله على شهادة دبلومة طب الجنين بجامعة طنطا، موضحًا أنه مرّ بضائقة مالية لم يتمكن على إثرها من سداد قيمة الامتحان، فاضطر إلى التفكير في بيع خاتم زواجه للحصول على المبلغ اللازم، وبذهابه إلى محل المصوغات تفاجأ بإرسال أصدقائه المبلغ المطلوب لدخول الامتحان.
شاب يوثق مساعدة أصدقائه له للحصول على دبلومة بدلا من بيع خاتم زواجه
وشارك الشاب منشورًا عبر حسابه بمنصة التواصل الاجتماعي فيسبوك: «شهادة دي كان تمنها دبلة مراتي.. بعد ما عدى آخر معاد للدفع وتم إنذاري إني هتمنع من دخول الامتحان وضاقت عليا الأرض بما رحبت، والحياء قاتلني إني أطلب من حد، مكنش قدامي غيرها لأنها كانت آخر حاجة... أخدتها وأنا نفسي مكسورة وإحساس قاتل بالعجز والخجل من نفسي أكتر من يوم أخدها وأروح الشغل وأرجع من غير ما أبيعها، مش هاين عليا والله... لأنها رمز مش مجرد جرامات دهب».
وتابع: «في اليوم اللي خلاص غلبت نفسي فيه، وقبل ما أنزل من العربية على أول الشارع صورتها نفس الصورة اللي قدامكم دي وهي محطوطة في ورقة شبه المنديل المحلاوي اللي فتحته فاطمة تعلبة وطلعت منه الدهب في مسلسل الوتد.. ورفعتها على جروب الشلة عالواتس وقولتلهم أنا داخل أبيعها علشان أدفع فلوس الدبلومة.. كده يعني سيبت الرسالة علشان أكون عملت اللي عليا مش أكتر، إني استنفدت كل الأسباب والله. يادوب وصلت محل الدهب ولسه هدخل لقيت جايلي 3 رسايل فيها الفلوس، وزيادة، وتم إنقاذ الدبلة في آخر لحظة».
وأشار: «أنا عارف إن مش لطيف أبدًا أتكلم في تفاصيل زي دي، بس أنا أحتسب الكلام ده عند ربنا إنه يكون دافع لأي حد واقف في مكانه، أو حد في الطريق وحاسس باليأس إنه يكمل، أو حد خجلان إنه يعافر ويحارب.. وفي نفس الوقت أفتكر نعمة ربنا سبحانه وتعالى وفضله عليا... لأنى أعتقد إن الدبلومة دي كانت سبب إني اتقبلت في الانترفيو وسافرت بعد ما كنت فقدت الأمل تمامًا في تخصص عقيم زي النسا السفر فيه شبه مستحيل، لكن الأجمل من كل ده هي اللحظة الجميلة اللي كنت مستني أكتب فيها البوست ده... الحمد لله الذي بنعمته تتم الصالحات تم حصولي على دبلومة طب الجنين والأشعة من جامعة طنطا، ودي دبلومة متخصصة في الكشف المبكر عن العيوب الخلقية للأجنة».
