محمد رمضان: مبحبش الفشلة وعمري ما حسيت أني مظلوم.. وبنحاول نقتضي بعبد الحليم حافظ في علاقتنا بالجمهور
حل الفنان محمد رمضان، ضيفًا على برنامج صباح العربية، وتحدث خلال اللقاء عن تفاصيل مشواره الفني واختياراته الفنية وقناعات الشخصية، بجانب الإجابة على سؤال تعمده إثارة الجدل بشكل مستمر.
أبرز تصريحات محمد رمضان في قناة العربية
- نجاحي المالي عمره ما غير اختياراتي الفنية، وطول الوقت بشتغل بروح الهاوي.
- اختياراتي الفنية بناء على طمعي في جمهوري، وبعد مسلسل الأسطورة أي ممثل مكاني كان هيعمل الأسطورة رمضان اللي بعده، ولكني رحت عملت شخصية ضابط بوليس.
- أنا مش مبتعد ولا حاجة، أنا غيبت عن الدراما 3 سنين لأني كنت مشغول جدًا في فيلم أسد، هو فيلم مهم ومحتاج وقت في التحضير والتصوير، وخلصت الفيلم ودلوقتي جاهز أعمل مسلسل لـ رمضان 2027 واستنوه على MBC.
- الجمهور يعرف عني كل حاجة، النجم بيقرر يصنع العلاقة بينه وبين الجمهور، وأنا اختارت أصنع علاقة مع الجمهور واضحة من كل الأركان، الجمهور شافني في كل حاجة، شاف ولادي وعيشت معاه كل مراحل حياتي، فيه نجم آخر ممكن يختار أن اللي بينه وبين الجمهور شغل والجمهور ميتدخلش في حياته الشخصية.
- إحنا عندنا مرجع قديم جدًا وهو علاقة عبد الحليم حافظ بالجمهور، ده دخلنا أوضة نومه وشفنا السرير اللي بينام عليه وهو عيان وشفنا الأدوية وبيته، ما حدش ضربه على إيده ولكنه قرر يصنع علاقة عظيمة مع الجمهور وكلنا كنجوم بنحاول نقتضي بيه.
- الإنجليزي بتاعي مش مثالي ولكني مبعطلش مع فريقي وهما نصهم أمريكاني، وأنا بشوف أن الفن في حد ذاته لغة، والموسيقى والتمثيل لغة، يعني المشاعر واحدة الحزن والفرح والدهشة كلهم شيء واحد.
- أنا عارف أن الخطوات اللي بناخدها النهاردة علشان ما لهاش مرجع فالعقل بيعطل، وعلشان محمد رمضان قدر من المنطقة العربية بلغته وثقافته يخترق الحدود والحواجز، وده طبيعي زي أول واحد طلع على القمر الناس كانوا شايفينه مجنون وإزاي يعمل كده، ولكن مع تاني وتالت ورابع واحد لقوا إن بقى فيه استقبال لأن بقى فيه واحد مرجع ليهم.
- الشهرة خدت بعض المساحات من حياتي الشخصية ولكن بكل رضا وحب، عمري ما حسيت أني مظلوم والشهرة ظالماني، أنا راضي بضريبة طريقي وأي ضرائب هدفعها هتكون بكل حب ورضا لأني اتمنيتها من قلبي من ربنا، فا لما ربنا يحققها هشوف سلبيتها إيه، أنا شايف أن كل شيء في مكانه وقابل الأكتر والأكتر منه.
- مش مقصود أني أثير الجدل، المقصود زي العلاج بالضبط، أنا بستهدف شريحة فبيحصل آثار جانبية عند شريحة أخرى، زي ما بتاخد علاج للكبد فيضعف وظائف الكلى، أنا ممكن أبقى بعمل شيء أخاطب بيه الشريحة C، فيقوم الشريحة A وB يزعلوا، فأعمل مشروع ليهم، فأنت طالما حريص تكسب كافة الشرائح ارتضي أن فيه بعض الشرائح هتفهم غرضك إيه من تصرفاتك.
- أكيد بعض النقد تحول لهجوم شخصي عليا، لأن النجاح السريع بيستفز بعض الناس اللي بتبقى عايزة تقدم مبررات لفشلها، فبيبقى عايز يقول أن اللي معندوش واسطة مبينجحش، طيب ما محمد رمضان ماعندوش واسطة ونجح، دايمًا الفاشل ميحبش الناجح، وبالتبعية الناجح ميحبش الفاشل، وأنا محبش الفشلة نهائي.
- عمري ما ندمت على أي قرار في مسيرتي الفنية، كل مشروع عملته وتصرف عملته كان مدروس وبناء على خطة ووعي ودراسة، الوعي قبل السعي، يعني أنا بخاطب مين ده أول سؤال بسأله قبل ما أعمل مشروع.
- الناس انتقدوا لبسي بشكل كبير في المنطقة العربية في حفلي بـ كوتشيلا ولكن أنا شغال لمستمعين تانيين خالص، أنا عامل آلاف الحفلات في الشرق الأوسط عمر ما حد انتقد لبسي في حفلاتي بالشرق الأوسط، ولكني درست كوتشيلا، ودرست أنه مهرجان قائم على الابتكار واللبس اللي مش طبيعي، واجتهدنا وجبت مصممة أزياء مصرية وعملت الشكل.
- الناس وجهوا اللبس في حتة مش مظبوطة، ولو رجع الوقت تاني هلبس نفس اللبس ولكن هاخد بالي من بعض التفاصيل وهطول الدرع الفرعوني أكتر وهخلي شكله أفضل، ولكن مكنتش هغير الإطلالة خالص.
