معتمد جمال: الفوز على بيراميدز مهم.. والزمالك لم يحقق شيئًا بعد
تحدث معتمد جمال المدير الفني لفريق الزمالك عقب الفوز على حساب بيراميدز بنتيجة 1-0 في مسابقة الدوري المصري الممتاز على استاد القاهرة الدولي.
تصريحات معتمد جمال
وقال معتمد جمال في المؤتمر الصحفي: الفوز على بيراميدز خطوة مهمة، والفريق لسه ما عملش أي حاجة لحد دلوقتي، لا في الدوري ولا في الكونفدرالية.
وأضاف: كل الناس كانت عارفة صعوبة اللقاء، خصوصًا قدام فريق قوي زي بيراميدز وإمكانياته الكبيرة، الفوز ده بيقرب الزمالك خطوة من المنافسة على الدوري، لكن المشوار لسه طويل.
وتابع معتمد جمال في تصريحاته: فكرة إن الماتش بـ6 نقط مش صحيحة، لأن لو الفريق خسر قدام إنبي في المباراة الجاية، يبقى كأنه ماعملش حاجة، وده يخلي التركيز لازم يكون كبير جدًا في اللي جاي.
وأردف: الزمالك عدى ماتشين مهمين قدام المصري وبيراميدز، لكن لسه قدامه تحديات أصعب، خصوصًا مع ضغط المباريات، ومواجهة إنبي والأهلي في ظرف خمس أيام بس.
واستكمل في تصريحاته: الجهاز الفني هيبدأ فورًا التحضير لماتش إنبي، اللي شايفه أصعب من مواجهة بيراميدز، بسبب ضيق الوقت والإجهاد، وإصابة بنتايك في العضلة الضامة.
وأتم معتمد جمال تصريحاته: وبشكر كل اللاعيبة على المجهود الكبير اللي بيقدموه طول الموسم، وكمان شكرًا لجماهير الزمالك اللي واقفة ورا الفريق وبتدعمه دايمًا.
