سمية درويش: تعرضت لمواقف صعبة وقت ارتدائي الحجاب.. واكتشفت إن الشر في الناس لا علاقة له بالدين
تحدثت الفنانة سمية درويش، عن فترة ابتعادها عن الساحة الفنية، كاشفة عن صراع نفسي مرّت به وأسباب تفكيرها في الاعتزال.
وقالت في لقائها مع القاهرة 24: "طول الوقت كنت حاسة إني بعمل حاجة غلط، وأنا اللي ظلمت نفسي لأني استسلمت ومكنتش قوية كفاية، ومينفعش نيأس لأن ربنا موجود".
وأضافت، أنها مرّت بظروف صعبة جعلتها تفكر بشكل سلبي، قائلة: “كنت بفكر أفكار وحشة جدًا، وحصلتلي مواقف في حياتي مقدرتش أستحملها، لحد ما جه داوود إيني، وكان بيديني الدافع أكمّل”.
وتابعت: "أنا من عيلة متدينة، وجدتي كانت دايمًا تقولي غني كلام ربنا وماتغنيش للدنيا، وربنا خلق صوتك حلو عشان توصلي كلامه، وده كان مخليني عايشة في صراع نفسي وكان بيفرض عليا فكرة الاعتزال".
وأشارت إلى أنها وصلت حاليًا لمرحلة من التصالح، موضحة: "دلوقتي بقيت متصالحة، واكتشفت إن الشر اللي في بعض الناس ملوش علاقة بالدين أو الحجاب، وكمان لما اتحجبت واشتغلت اتعرضت لمواقف ماحصلتش وأنا بشعري، وبحاول دلوقتي أحافظ على لبسي".
وسبق أن أعلنت الفنانة سمية درويش إنهاء خلافها مع الفنانة شيرين عبد الوهاب، مؤكدة أنها لا تحمل لها أي مشاعر سلبية، ومتمنية لها الخير خلال الفترة المقبلة.
وقالت سمية درويش في تصريح خاص لـ القاهرة 24: "أتمنى لها كل خير، وربنا يخرجها من فترة الاكتئاب لأنها فترة صعبة، وأنا مريت بيها.. وكلنا بنغلط، ومش عشان موقف شخصي أكرهها".
وأضافت: "يا رب ترجع لأولادها وفنها، وأتمنى أشوفها بخير قريب".
