خالد الصاوي: الفترة الماضية كنت بقول هموت إمتى.. وواحشني الشغل مع حلمي
كشف الفنان خالد الصاوي، عن العديد من كواليس حياته الشخصية والمهنية، كما تحدث عن كواليس مسلسله الجديد أولاد الراعي والذي شارك من خلاله في سباق رمضان 2026.
خالد الصاوي: الفترة اللي فاتت كنت بقول هموت امتى
وقال خالد الصاوي، خلال تصريحات في أحد البرامج الإذاعية: العام الماضي زي دلوقتي كنت في أسوأ حالاتي، سواء صحيا أو نفسيا، وعملت وقفة مع النفس عشان أعدي المحنة دي وصلت لمرحلة إني بسأل نفسي هموت إمتى، وماكنش عندي حاجة حاببها عشان أعيش عشانها، واللي ضايقني أكتر ردود فعل الناس على شكلي في السوشيال ميديا، وكانت محبطة جدا بالنسبة لي، وأنا صغير كان عندي غرور جدا في حياتي الشخصية، وده انعكس عليا في أدائي المهني والغرور بوّظ لي حياتي كلها.
وأضاف: تعلمت إني استغنى عن الملذات، وأواجه الغلطات في حياتي بصراحة، وأصلح المشاكل عشان أعرف أبدأ من جديد، وأهم شيء هو السعي والإخلاص عشان أعدي أزمتي، تاريخ ميلادي الصحيح هو 25 نوفمبر 1963، وبحمد ربنا إنه وفقني في مختلف مراحل حياتي ونجاني، لقيت الناس جنبي لما وقفت على رجلي مش وأنا مريض، وإحنا كبشر مش بنحب الضعف ومش كل الناس عندها قوة إنها تساعد حد، علاقتي بربنا اتغيرت الفترة اللي فاتت، وكنت عايز أحافظ على الصلة اللي بيني وبينه.
واستكمل قائلًا: مرحلة سن الخمسين كان فيها أحلى وأسوأ الأوقات في حياتي، ولقيت فيها حب حياتي واتجوزت ونجحت في بطولات أعمالي، وأخدت جوايز ونجحت ماديا أيضا، أخطائي في مرحلة الخمسين كانت الغرور والتبذير والهدر في الصحة والوقت، وكمان الهدر في الفرص، أنا أسرع شخص ممكن يعتذر، ولما بكتشف إني غلطان وأذيت حد بندم وبراضيه، بس مش بأذي حد عن قصد.
وعن فيلم حدوتة قال: واحشني الشغل مع أحمد حلمي، وهنشتغل مع بعض في فيلم قريب جدا اسمه "حدوتة"، وعايز أشتغل تاني مع تامر حسني وكريم عبدالعزيز وأحمد السقا.
