خالد منتصر يعلق على تصريحات تامر حسني بشأن التغذية السليمة: أسئلة ساذجة وجمهورك مش ناقص تشويش
علق الدكتور خالد منتصر على تصريحات الفنان تامر حسني، بشأن التغذية السليمة، منتقدًا ما وصفه بـ الأسئلة الساذجة المتعلقة بقضايا طبية وعلمية.
خالد منتصر يعلق على تصريحات تامر حسني بشأن التغذية السليمة
وكتب الدكتور خالد منتصر منشورًا عبر صفحته الرسمية على فيسبوك، قال فيه: يا عزيزي تامر الفنان العزيز، طبعا إنت مش عايز تقول إنك مقتنع بنظام الدكتور ضياء العوضي وتطرح أسئلة ساذجة وبديهية، وده لأن الدكتور ضياء لف لك الطب في سيلوفان ديني، لا يوجد سؤال أكثر سذاجة من سؤال الأدوية لازم تتاخد ولا لأ!، ده عامل زي سؤال هي لازم الشمس تطلع؟.
وواصل منتصر: اللي كان بيقوله دكتور ضياء يا أخ تامر اسمه في الطب ضلالات، والضلالات لا تناقش، ما تقوليش، ما تناقشه إن الأنسولين مهم للمرضى أطفال السكر، وإن عدم شرب المياه مفيد للكلى لأن ده كأني أناقش واحد في عنبر الخطرين.
وانتقد منتصر لجوء بعض المشاهير إلى مناقشة موضوعات علمية دون خلفية كافية، داعيًا إلى ضرورة الاعتماد على المصادر العلمية الموثوقة، والابتعاد عن نشر معلومات قد تُسبب تشويشًا للجمهور، قائلًا: مكسوف تقول إنك مقتنع بالطيبات، كل نوتيلا وربع كيلو سكر وما تشربش مياه في هدوء، وبعيد عن جمهورك اللي للأسف مش ناقص تشويش.
تصريحات الفنان تامر حسني
وكان وجّه الفنان تامر حسني مناشدة إلى وزارة الصحة المصرية وعدد من الأطباء والمتخصصين أبرزهم الدكتور مجدي يعقوب، مطالبًا بتقديم توضيحات علمية مبسطة حول التغذية السليمة، في ظل الجدل الدائر مؤخرًا حول الأطعمة المفيدة والضارة.
تصريحات تامر حسني
وكتب تامر تامر حسني في منشور عبر حسابه الشخصي بموقع فيس بوك: في ظل الفتنة الغذائية اللي حاصلة في مصر وحديث كل الناس دلوقتي عن إيه المفيد لينا وإيه المضر، هل ممكن أناشد وزارة الصحة المصرية وكبار الدكاترة المختصة وأصحاب المستشفيات بردود كافية فيها شرح مفصل عن إيه الأكل المفيد لينا، وإيه اللي مش مفيد.
وأردف تامر حسني: ياريت يكون شرح مفصل يفهمه الشخص العادي من غير أي مصطلحات طبية أجنبية، أولًا: الخضار أمثال الخس والجرجير وورق العنب وكل الورقيات مفيدة ولا لأ وإزاي نطمن إنها مش مرشوشة مواد تمرض الناس، ثانيًا: البيض والفراخ اللي في بلدنا ناكله إزاي وإزاي نميز ونطمن إنه مش محقون وإزاي نعرفه لو محقون، ثالثًا: شرب المية بكثرة كما تعلمنا مفيد ولا لأ، رابعًا الحليب مضر ولا كويس وإيه الصح اللي نشربه، خامسًا: الأدوية لازم تتاخد ولا مش لازم ولا مش أي أدوية تتاخد.
