الكشف بـ4000 جنيه.. صيدلي يروي تفاصيل وفاة زوجته نتيجة اتباع نظام الطيبات لضياء العوضي: قالها هتعيشي 30 سنة
أوضح الصيدلي محمود البوريدي زوج الدكتورة الشيماء مسعد البديوي، المتوفاة نتيجة اتباع نظام الطيبات للدكتور الراحل ضياء العوضي، تفاصيل جديدة حول وفاة زوجته نتيجة اتباع تعليمات الدكتور ضياء العوضي لعلاجها من مرض الذئبة الحمراء.
وقال الصيدلي محمود البوريدي، في تصريحات خاصة لـ القاهرة 24، زوجتي الدكتور شيماء كانت تعمل صيدلانية، وفي 2018 تم تشخيصها بمرض الذئبة الحمراء، وكانت تتابع مع دكتور متخصص في حالتها بالإسكندرية، وكانت ماشية على علاج الكورتيزون ومثبطات للمناعة، وكانت حالتها الصحية مستقرة وتعمل تحاليل طبية كل 3 أشهر وتتابع مع الدكتور لحد عام 2025.
صيدلي يروي تفاصيل وفاة زوجته نتيجة اتباع نظام الطيبات للدكتور ضياء العوضي
وتابع محمود البوريدي: زوجتي شافت الدكتور ضياء العوضي في أحد البرامج مع إعلامي شهير، وصدقت كلامه وقتها، وبدأت تشوف الفيديوهات بتاعته على السوشيال ميديا وبعتتهالي، في الوقت ده أنا كنت مسافر خارج مصر، وشوفت له فعلًا فيديو 30 ثانية، ولكن قولت لها إن كلامه غير دقيق علميًا، وهي راحت له استشارة ومشيت على نظامه دون علمي، وتابعت معاه لمدة شهر، وتوفيت نتيجة نظامه في أغسطس 2025.
وأضاف محمود البوريدي، زوج الدكتورة الشيماء مسعود ضحية اتباع نظام الطيبات لـ الدكتور ضياء العوضي: زوجتي بدل ما كانت بتحلل كل 3 شهور مع الدكتور اللي في الإسكندرية، أصبحت بتحلل كل أسبوع مع ضياء العوضي، وأوهمها بالعلاج والشفاء دون أدوية، وبالفعل وقفت كل الأدوية اللي كانت بتاخدها دون علمي لأني كنت مسافر، وكانت النسب في التحاليل غير منتظمة.
واستكمل الزوج: زوجتي اتبعت نظام الدكتور ضياء العوضي لمدة شهر، ولكن حالتها الصحية تدهورت للغاية، هي كشفت مرة في العيادة ودفعت ثمن الكشف 4000 جنيه، وتابعت معاه أونلاين باقي الشهر، ولكن دون تحسن كل ده وهو مانعها من الأدوية اللي اعتادت عليها من 2018 ومن بعض الأطعمة، ولما بدأت تتعب في الآخر وحالتها الصحية تتدهور كانت تبعت له ويرد عليها بـ وقفي جبنة وبعض الأطعمة اللي كان بيحددها لها، كل الكلام ده أنا عرفته في الآخر لما حالتها تدهورت قبل وفاتها بوقت قليل.
واختتم محمور البوريدي: بعد وفاة زوجتي، أولادي عرفوني أنها كانت موقفة العلاج وكانت متبعة نظام الطيبات لـ ضياء العوضي، وكان معيشها في وهم العلاج والشفاء دون أدوية، وقال لها هتخفي وتعيشي 30 سنة دون أدوية، وللأسف هي صدقته ووثقت فيه، والنتيجة كانت انهيار جهاز المناعة وخلايا الدم.
