رسالة مؤثرة من نور الخطيب بعد الهجوم على والدها بسبب نتائج الأهلي
نشرت نور الخطيب، ابنة محمود الخطيب رئيس مجلس إدارة النادي الأهلي، رسالة مؤثرة بعد الهجوم على والدها بسبب تراجع نتائج الفريق في الفترة الماضية.
رسالة مؤثرة من نور الخطيب بعد الهجوم على والدها بسبب نتائج الأهلي
وقالت نور الخطيب عبر حسابها الرسمي على فيسبوك: ليه محمود الخطيب؟ اترددت كتير قبل ما أكتب أي حاجة، علشان اتعودت أسكت وقت ما السكوت كان أصعب اختيار.. مواقف واختبارات كتير عدى بيها محمود الخطيب، واتعودنا نحترم اختلاف الناس، واتعودنا نتجاوز عن إساءات كتير، واللي كان دايمًا بيهون علينا إن في الآخر ولا موقف ولا أزمة واحدة عدت إلا وربنا الحمد لله أنصفه فيها وكبّره وزوّده وكرّمنا معاه… ولا موقف دافع فيه عن نفسه، ولا موقف سمح لحد حواليه يستنكر مواقف الناس وزعلها، ولا مرة ضعف، ولا مرة غلط، ولا مرة برر… برغم إن دايمًا وفي كل المواقف اللي عدت، اللي ما اتقالش كان وما زال أكتر بكتير من أي حاجة اتقالت.
وأضافت: المشكلة مبقتش كورة، المشكلة بقت نفوس قاسية وظالمة، وبتستسهل الغلط والظلم، ونفوس مختلط عليها النقد والتجريح، ونفوس بتخاف تقول كلمة حق، وبتخاف من الناس من غير اعتبار لرب العالمين اللي مطّلع على كل حاجة… المشكلة إن اللي زي محمود الخطيب قليلين، مش ممكن يخسروا نفسهم ولا يغيروا طريقهم مهما اتسد، بس ربنا دايمًا بيوجد لهم طريق تلاقي فيه حد مش خايف يمشي عكس التيار، حد سوي يقول كلمة حق، حد يسند، وحد يطبطب، وحد يوقف دايرة الظلم والتعدي والتجني من غير دراية حقيقية.
واختتمت رسالتها التي نشرتها عبر حسابها على فيسبوك، قائلة: وأخيرًا، كل يوم باجاوب على نفس السؤال: ليه محمود الخطيب؟ ليه وإزاي اتغيرت ملامحه؟ ليه اتحمل جسمه وشالت روحه فوق طاقتها؟ ليه أخلاقه بتُختبر كل يوم في الوقت اللي كل حاجة فيه بقت مستباحة، وكل كلمة وكل حكم بقى بيطلع بسهولة حتى لو الواحد مش عارف أي حاجة… واكتشفت إن علشان هو يقدر يستحمل ويشيل شيلة بعدد سنين طويلة ومواقف كان ممكن تهد أي حد.. اختار هو يثبت ويشيل، وإن تناسى الجميع.. في الآخر النادي الأهلي هيفضل الأعظم مهما حصل ومهما اتغيرت الأسماء، وهايفضل محمود الخطيب شخصية يقف التاريخ عندها طول العمر.
