كل أسبوع بيضربهم.. سيدة تستغيث من تعدي طليقها بالضرب على صغارها خلال الرؤية بدمياط
نشرت سيدة، مقطع فيديو عبر حسابها الشخصي بموقع التواصل الاجتماعي فيسبوك، تضمن تعدي طليقها ووالد أبنائها بالضرب على ابنها أثناء الرؤية بدمياط، حيث ظهر في مقطع فيديو أب يعتدي بالضرب على صغيره خلال الرؤية فيما ظل الابن يصرخ ويتوسل لكي يتركه الأب، دون جدوى.
سيدة تستغيث من تعدي طليقها بالضرب على صغارها خلال الرؤية بدمياط
واستغاثت الأم في منشور لها عبر حسابها بموقع التواصل الاجتماعي فيسبوك: «ده أبو ولادي، منفصلة من ثلاث سنين، مسألش عنهم طول هذه الفترة، بدون نفقة على أولاده وهو مقتدر ماديًا صاحب معارض في دمياط، رفعت تمكين ورفعت نفقة بعد الثلاث سنوات، ولما لقى بدأت أتحكم في النفقة اللي هي 500 جنيه وأخذت التمكين، رفع رؤية من خمس شهور وبنروحها بانتظام، ومن أول يوم في الرؤية وهو بيقول للأولاد تعالوا عيشوا معايا وأنا هصرف عليكم، وكل ما يروحوا له يقرص فيهم ويقعد يضرب فيهم».
وتابعت السيدة التي تستغيث من تعدي طليقها بالضرب على صغيرها أثناء الرؤية: «ابني الكبير وابني الصغير اللي في الفيديو اللي بيتضرب، واشتكوا لي كذا مرة وبقوا مش عايزين يروحوا، لكن للأسف أنا بقعد أهدي فيهم وبقول يمكن هو ده هزاره، وهو هزاره تقيل شوية، إحنا لازم نروح يوم الجمعة، بدأ كل ما نروح ابني الصغير ده ما بيبقاش عايز يقعد معاه، ويقعد ينده عليه، وكل ما يروح له يقعد يشتم فيه بأبشع الألفاظ، ويقرص فيه ويلوي إيده، وده طفل صغير جسمه لسه ضعيف».
وأضافت: «في يوم كنت قاعدة وكان معايا والدتي، أخذ الأولاد في حتة بعيدة في النادي من ورا، ولقيت ابني خارج لي قاعد يكح وماسك رقبته جامد وحوالين رقبته أحمر، كان قاعد معايا ناس شافوا شكل ابني وهو خارج كده، وأنا لا أعرفهم ولا يعرفوني، بقول لابني مالك في إيه قال لي ده مسك رقبتي وخنقني جامد وكنت هرجع، ونفسي اتقطع وهو كان قاعد يضحك، وجريت من إيده، أخدت ابني ورحت عملت محضر، وجات معايا البنت اللي شافته ووالدتها وكان في حد تاني شهدوا معايا عملت إثبات حالة، بعدها جاب والدته تطاولت عليا وشتمتني، وتجنبت أنا المشاكل وما عدتش بروح الرؤية دي خالص، ووالدتي بقت بتيجي كل جمعة هي اللي بتوديهم الرؤية من شهرين».
واستكملت: «النهارده الجمعة بتاريخ 1/5 حصل اللي في الفيديو اللي حضرتكم شايفينه ده. ابني بقاله فترة مش عايز يروح له يقعد معاه، فهو قاعد متضايق إنه مش راضي يقعد معاه عشان بيقعد يشتم فيه وبيقعد يضرب فيهم. ابني ده كان قاعد مع والدتي، فالساعة جت 4:45 فقال لها أنا هقوم أنادي لأخويا عشان هنمشي، ولما راح شتمه، قام ابني رد الشتيمة للأسف، جاب آخره».
وأضافت: «والدتي قاعدة في حتة كده عالية تحت الشماسي، لأن الجو كان شمس جامد، وهو أخذهم في حتة ورا كده بعيد عنها، وقام تعدى على ابني بالضرب اللي أنتم شايفينه في الفيديو ده. ابني الكبير هو اللي بيحوش عنه وبيقول له سيبه، وابني راح نادي على والدتي وقال لها: الحقي ده بيضربني. والدتي جت تنزل وتلف، ولما شافها طلع يجري هو وأولاد أخته اللي كانوا معاه، ووالدتي راحت أخدت الولد ومشت، وصورت الفيديو واحدة كانت قاعدة هناك شافت المنظر قلبها وجعها على ابني».
