محمد رمضان: المصري اللي ماوصلش لقارته كأن أبوه مش معترف بيه.. وبتضايق لما نجم كبير يموت وبرا ميعرفوش أنه مات
تحدث الفنان محمد رمضان، عن النجاح الذي حققه في الدول الإفريقية سواء من خلال شعبيته بأعماله الفنية أو تعاوناته الغنائية وانتشاره عبر القارة الإفريقية، موضحًا أنه قرر الانتشار والنجاح إفريقيًا بسبب وفاة عدد من النجوم الكبار وعدم معرفة الشعوب الإفريقية والعالمية به.
وقال محمد رمضان، في تصريحات تلفزيونية: القارة الإفريقية بالنسبة ليا هي قارتي وعائلتي، والشخص المصري اللي ماوصلش لقارته كأنه شخص مثلًا أبوه مش معترف بيه، أنا عربي إفريقي والحمد لله كله بيقول النجم محمد رمضان، بس عائلة أبويا متعرفنيش إذا أنا ماليش شهادة ميلاد، علشان كده أنا سعيت لـ ده لأني كنت متضايق جدًا وحققت النجاح اللي كنت عايزه في القارة الإفريقية.
وأضاف محمد رمضان: بحس أني في بلدي وأنا في أي بلد إفريقية، زي ما بحس نفس الشعور في أي بلد عربي وفي مصر، العالم مينفعش ينكر وجودك أنا بقى عندي شهادة ميلادي في وطن عربي بيقول ده ابننا وفي قارة كاملة بتقول ده ابننا، ولازم إنجلترا وأمريكا يعترفوا بوجودك ده بالتبعية.
واستطرد محمد رمضان: الفكرة جاتلي لما نجم عربي كبير يتوفى وأكتشف أن ماحدش برا الوطن العربي يعرفوا أنه مات، لأنهم أصلًا مكانوش يعرفوا أنه عايش.
محمد رمضان
وعلى جانب آخر، يعرض حاليًا للفنان محمد رمضان، في دور العرض السينمائية فيلم أسد، ويشاركه في البطولة كل من الفنانة رزان جمال، وعلي قاسم، وكامل الباشا، وإسلام مبارك، ومصطفى شحاتة، إلى جانب ظهور خاص لكل من ماجد الكدواني وأحمد داش، وإخراج محمد دياب وتأليف شيرين دياب ومحمد دياب وخالد دياب، وموسيقى تصويرية لهشام نزيه.
