مصطفى بكري عن أزمة العدادات الكودية: من أكثر الملفات التي تشكل صداعا للمواطنين
كشف الإعلامي مصطفى بكري، مستجدات أزمة العدادات الكودية، معلقا: “واحدة من أكتر الملفات اللي عاملة صداع للمواطنين، خصوصًا بعد ما ناس كتير كانت فاكرة إنها حل مؤقت وهيعدي، لكن الواقع بيقول إن الأزمة لسه مستمرة، ويمكن كمان بتكبر يوم بعد يوم”.
وقال بكري خلال برنامج حقائق وأسرار المذاع على قناة صدى البلد: “ناس بتشتكي من ارتفاع الفواتير بشكل مبالغ فيه، وناس تانية بتقول إن الاستهلاك بيتحسب بطريقة مش مفهومة، وفي مواطنين فوجئوا بمديونيات وغرامات اتضافت عليهم، غير أزمة إن العداد الكودي نفسه مش معناه إن الشقة أو العقار بقى قانوني أو متقنن، وعلشان كده اتقدمت بطلب إحاطة للحكومة علشان نعرف ونفهم إيه اللي بيحصل بالضبط، وإمتى الأزمة دي هتخلص؟؛ لأن آلاف الأسر عايشة في قلق مستمر، خصوصا إن ناس كتير ركبت العدادات دي من سنين ولسه مش عارفة مصيرها إيه، وهل هيتحول العداد لعداد قانوني دائم ولا هيفضل وضع مؤقت وخلاص؟".
واختتم قائلا: «أنا سألت وزير الكهرباء عن الأزمة وقال لي أي حد هيجي لنا هنرجعه للوضع القانوني القديم.. يا فندم لازم نفصل بين اللي سارق كهرباء أو مخالف، المخالف مالوش علاقة، والمخالفة بتتصلح مع الحكومة لكنها بتأخذ سنوات، يعني إيه سعر الكيلو وات يرتفع من 68 قرش لـ2.74 قرشا.. عندنا مش أقل من 6 ملايين عداد كودي، نتمنى من رئيس الوزراء سماع صوت المواطن.. الناس يا فندم مش قادرة تدفع.. هذا الموضوع لابد ان ينتهي واسمعوا تعليمات الرئيس.. هذا الكلام غير منطقي ولا قانوني.. المواطن ما سرقش».
