معتمد جمال: بعد خسارة الزمالك أمام الأهلي كان نفسي أبوس دماغ كل زملكاوي.. وشيكو بانزا لاعب كبير
تحدث المدير معتمد جمال الفني لفريق الزمالك، عن كواليس تتويج الفريق بلقب الدوري الممتاز، وأسباب اعتماده على بعض اللاعبين، إلى جانب تفاصيل إدارته للمباريات الكبرى، مؤكدًا أن هدفه كان تحقيق الانتصارات في ظل الظروف الصعبة التي مر بها الفريق خلال الموسم.
معتمد جمال مدرب الزمالك
قال معتمد جمال مدرب الزمالك، في تصريحات خلال برنامج الكورة مع فايق: لما حد ييجي يقول بتلاعب عبد الله السعيد ليه؟ عبد الله لو خرج من الملعب هتبقى عندي مشكلة كبيرة، لأنه أكتر لاعب بيجري بالأرقام، وبزعل من أي انتقاد ضده.
وواصل: بشوف كل منافس هيلاعبني إزاي، وبحدد أنا محتاج من المباراة إيه، وقوتنا كانت في التحولات، ومكنش عندي فرصة ألعب كرة استحواذ، وأنا مش جاي عشان أمتعكم في الظروف دي.
وأضاف: بيراميدز عمره ما كان بيسيب الكرة لأي فريق، لكنه عمل كده قدامنا في المباراة الثانية عشان يقفل علينا التحولات، وبين الشوطين في مباراة الزمالك وبيراميدز قلت للاعبين عايزين نبوظ اللعب ومش عايز كرة حلوة.
وواصل مدرب الزمالك: استنيت إن مدرب بيراميدز يطمع في المباراة الثانية، وعشان كده دفعت بشيكو بانزا.
وواصل: شيكو بانزا لازم يحس إنك بتحبه، وهو لاعب كبير وصاحب مود، وبيزعل لما ميبدأش أساسي، وبيقولك أنت كده مش بتحبني.
وتابع: بعد خسارة الزمالك أمام الأهلي كان نفسي أبوس دماغ كل زملكاوي، وبكيت بعد الخسارة من اتحاد العاصمة وخسارة الكونفدرالية، لأني كنت شايل هم زعل الجماهير.
وأضاف: في مباراة الأهلي والزمالك كنت شايف إننا الأفضل، لكن مباريات القمة مفيهاش حسابات، ولو كنا سجلنا ركلة الجزاء أمام الأهلي كان ممكن نرجع في النتيجة.
وواصل: حسام عبد المجيد هو رقم واحد في تسديد ركلات الجزاء، وبعده عبد الله السعيد.
واختتم: قلت لفتوح يقول لحسام عبد المجيد يسيب ركلة الجزاء أمام الأهلي لعبد الله السعيد أو عدي الدباغ، لكنه رد وقال حسام مركز وسيبه يلعبها.
