زيزو: البطولات الكبيرة ليست السبب الأول لانتقالي للأهلي.. هناك أسبابا أخرى
تحدث أحمد سيد زيزو لاعب فريق الكرة الأول بالنادي الأهلي، عن كواليس ظهوره الأول بالقميص الأحمر عقب انتقاله قادمًا من نادي الزمالك خلال فترة الانتقالات الصيفية الماضية.
تصريحات زيزو
وقال زيزو في تصريحات مع الإعلامي سيف زاهر: ظهوري الأول مع الأهلي كان في بطولة كأس العالم للأندية وكان شيء صعب وحلو في نفس الوقت، وربنا أعطاني كل شيء يُسهّل الأمور عليّا، وأنا مش من الناس اللي بتصعّب الأمور بل بسهّل الأمور خالص، أصل إيه اللي ممكن يحصل؟.
وأضاف: الضغوط بتخليني أحسن وعندي دافع أكبر خصوصًا لو عندي ثقة كبيرة في ربنا وإن كل حاجة بتدبيره، وأنا بعمل اللي عليّا وكده كده المكتوب هيحصل، وطول ما أهلي كويسين وأنا كويس الحمد لله مفيش حاجة صعبة، وقبل مونديال الأندية بشهرين لما حصلّي الإيقاف من نادي الزمالك، قعدت أتمرن من الصبح لـ بليل وأوقات كانت بتوصل 3 مرات في اليوم، وكانوا أصعب شهرين في حياتي، وأنا كنت بتمرن كل حاجة حتى الكرة، وأنا وقتها مكنتش عارف لسه أنا رايح أنهي نادي.
وأشار زيزو في تصريحاته: لما وصلت أمريكا كان هناك مباراة ودية مع باتشوكا، وريبيرو قالي إيه دنيتك قولتله بقالي شهرين مش بتمرن بس لو لعبت نصف ساعة هيبقى أفضل، وريبيرو كان بيثق في كلامي جدًا، وارتداء قميص الأهلي عقب لعبي في الزمالك مكنش شيء عادي كان شيء مختلف، ولكنه ليس ضغطًا، حيث كنت أرى الأهلي لمدة 6 مواسم المنافس، وكان شيئًا غريبًا بالنسبة لي ارتداء القميص الأحمر بعد الأبيض، الموضوع كان غريب من خارجه، والمنافس بتاعي بقاله 6 مواسم أصبح فريقي، واللقطة في البداية كانت غريبة، ولكن فيما بعد انتهت خلاص.
وأردف: كل لاعبي الأهلي في منتخب مصر سهلّوا الدنيا عليّا لما لبست القميص الأحمر، وأنا مش اجتماعي أوي، واللي كنت بعمله في الزمالك بعمله في الأهلي وبتجنب الدخول في أي مشاكل، واللعب في كأس العالم للأندية ممتع للغاية، والبطولات الكبيرة ليس السبب القوي لانتقالي للأهلي، بل كانت هناك أسباب أخرى مثل الشغف والطموح في الحياة المهنية، والأهلي كان أفضل اختيار.
وأفاد زيزو في تصريحاته: كنا نطمح ونقدر نوصل لمرحلة أبعد من كدة، ولكن الدنيا كانت مرضية بالنسبة لي لأن كان بقالي شهرين ملعبتش مباراة، ولكن بالنسبة للجمهور لم تكن مرضية لأنهم كانوا مستنيين الفريق يوصل لمنطقة أبعد من كده، وأنا لاعب كرة محترف هدخل تجارب كثيرة للغاية فيه منها الصعب والسهل وفيه منها النجاح والفشل.
وعن لقطة ركلة الجزاء أمام إنتر ميامي، كشف زيزو تفاصيل الحديث قائلًا: وسام أبو علي كان المسدد الأول لركلات الترجيح، ولم أكن أعلم من المسدد الأول ولم أكن أريد تنفيذ الركلة.. وقلت لتريزيجيه: “هو انت رقم 1؟ خلي رقم 1 يشوط أيًا يكن مين هو” لأنني مكنتش أعرف مين رقم 1 وكنت فاكره هو رقم 1 عشان كده خد الكرة وشاط، ولو أنا كنت رقم 1 كنت هشوط عادي.
وأتم تصريحاته: فريق الأهلي السنة دي جديد، و3 مدربين جداد، وتجربة جديدة للغاية، والأهلي بيغيّر جلده، ومعظم لاعبي القوام الأساسي جُداد عشان كده النتائج مكنتش مرضية.
