تامر حسين مدافعًا عن عزيز الشافعي بعد انتقادات أغنية بحرية: المسؤولية مشتركة مع المطرب اللي بيختار
حرص الشاعر الغنائي تامر حسين، على دعم الشاعر والملحن عزيز الشافعي، بعد الانتقادات التي طالته مؤخرًا بسبب أغنية بحرية، التي جمعت الفنانة شيرين عبد الوهاب، والفنان محمد حماقي.
وقال تامر حسين، عبر حسابه بـ فيس بوك: أنا طبعًا شهادتي مجروحة في عزيز الشافعي، كصديق وكراجل مبدع سواء كمؤلف أو ملحن. التزمت الصمت لحد الفيديو بتاعه اللي عمله إمبارح، احترامًا لآراء الجمهور سواء اللي عاجبه أو اللي مش عاجبه.
وأضاف: جميع الآراء تُحترم، وعزيز نفسه أكيد يتقبل ده بصدر رحب طالما في نطاق النقد الطبيعي والاحترام المتبادل دون التجريح في شخصه، ودي بتحصل معانا جميعًا. ممكن تتوفق في عمل، وعمل تاني ما يعجبش الناس. مفيش عداء بينا وبين الجمهور اللي ياما سقف لنا وشجعنا وكبّر أسامينا بثقته فينا وفي أعمالنا، ومقدر جدًا فكرة العشم الفني من الجمهور في المبدع اللي بيدعمه.
واستكمل: بس حقيقي في فرق شاسع بين “نقد بناء” يفيد المبدع ويرجعه لصوابه، وبين حد بينتقد بمنتهى القسوة، ما بيتعاملش معاك كبني آدم، يسب ويتجاوز ويلعن ويلغي تاريخك بالكامل ويختزله في عمل إنت مش موفق فيه بالنسبة له، أنا شايف إن عزيز كتب أغاني عظيمة كتير وكسرت الدنيا، آخرهم “مش حبيبي بس” و”كلكوا خاينين”، وقبلهم “علامات”، “إنت ما بتغبش”، “زي مانتي”، “خاصمت الشوارع”، و”تعالى أدلعك”، ودي أغاني اتشهرت في الوطن العربي بالكامل.
واختتم: تاني وتالت ورابع بأكد إن المؤلف والملحن بيجيلهم المطرب عايز يسمع مجموعة أغاني يختار منهم اللي حابب يقدمه، المسؤولية مشتركة كمان مع المطرب اللي بيختار، مفيش مؤلف أو ملحن بيقرر ينزل مع مطرب بأغنية معينة بشكل منفرد، لأن المطرب زي المدير الفني لفريق كامل، عايز من كل مبدع حاجة معينة من خلال رؤيته الكاملة لألبومه، ممكن يبقى المبدع قدّم أغاني درامية أو أغاني دسمة، والمطرب شايف إنه محتاج منه نوع تاني أو أغاني أخف للصيف، ومش قصدي مطرب بعينه، ده اللي بيحصل معانا جميعًا حسب احتياج كل مطرب ورؤيته.
