المتهم بقتل جاره في العياط لابتزازه بفيديو مخل: أنا مدخلتش مدارس وعلاقتي بمراتي زي الفل | تحقيقات
يواصل القاهرة 24 نشر التحقيقات في قضية إقدام عامل على قتل جاره وإحراق جثته بسبب محاولة الأخير ابتزاز المتهم بفيديو مخل، يجمعه بإحدى السيدات، بمنطقة العياط بمحافظة الجيزة.
المتهم بقتل جاره في العياط
واستمع رجال التحقيق إلى أقوال المتهم بقتل شاب العياط وبسؤاله عن ظروف وطبيعة نشأته، وجاءت كالآتي:
ج: أنا اتولدت في بيت مكون مني وأخويا و4 بنات، وأبويا كان شغال موظف في الري وكمان كان فلاح وأمي كانت فلاحة وكانت حياتنا كويسة وكنا في أسرة متوسطة وأبويا لسه عايش لحد دلوقتي، وأمی اتوفت من 6 سنين وأخويا الكبير شغال موجه في التربية والتعليم، وأخواتي البنات متجوزين وأنا اتعلمت سنة واحدة كنت بهرب من المدرسة ومكملتش تعليمي ومكنتش بحب أروح المدرسة، وكنت بعد لما بهرب بروح أشتغل في الغيط مع أمي وأبويا، وأنا بدأت شغل في الفرن من وأنا عندي 11 سنة، اشتغلت في الفرن وكنت باخد أجر بسيط لحد ما اتعلمت صنعة العجين وبعدين سبتهم واشتغلت في محل فراخ، وقعدت خمس سنين وبعدين دخلت الجيش وقعدت فيه 3 سنين واتجوزت قبل ما أدخل الجيش وأنا عندى 20 سنة، وبعد لما خلصت الجيش اشتغلت في الفرن واتعينت عامل في مسجد وأنا بروح المسجد وأصلي جميع الأوقات علشان بنضف المسجد بعد لما الناس تخلص صلاة وبأذن للصلاة في بعض الأوقات.
س: ما طبيعة عملك تحديدا؟
ج: أنا شغال عامل في مسجد وكمان شغال عمل إضافي في فرن عيش وعندي أرض مأجرها وبزرعها أنا وأخويا وأنا معايا أرض ملك حوالي 13 قيراط وبزرعها أنا وأخويا برضو.
س: كم مدة عملك في المسجد وكذا في المخبز سالف الذكر؟
ج: أنا اشتغلت في المسجد من حوالي 26 سنة وفي فرن العيش من حوالي 30 سنة.
س: ما حالتك الاجتماعية تحديدًا ؟
ج: أنا متجوز من 1993.
س: ما طبيعة العلاقة فيما بينك وبين زوجتك؟
ج: علاقتي بيها زي الفل.
س: هل رزقت بأبناء من ذلك الزواج؟
ج: أيوه معايا "ج" وشغال غفير نظامي وعنده دلوقتي 28 سنة وجوزته و"س" عنده 25 سنة وشغال في محل فراخ و"ب" عندها 27 سنة ومتجوزة ومش بتشتغل، و"ا" عنده 21 سنة وشغال في محل فراخ ومتجوز و"م" عنده 16 سنة ولسه متجوزش ومش بيشتغل.
س: وما مصدر دخل الأسره تحديدا؟
ج: هي حالتي المادية كويسة علشان أنا شغال كذا شغلانة، وبقبض من شغلي في الجامع 6 آلاف جنيه وبقبض من الفرن حوالي 4000 جنيه، والأرض زي ما تجيب كل سنة.
س: ما مؤهلك الدراسي؟
ج: معيش أي مؤهل وأنا روحت سنة واحدة المدرسة وكنت بهرب منها وبعدين بطلت أروح.
وقضت الدائرة الخامسة بمحكمة جنايات القاهرة بـ 15 مايو، برئاسة المستشار أسامة عبد الظاهر أحمد رئيس المحكمة، وعضوية المستشارين جودت ميخائيل قديس وجمال أحمد حتة، ومحمد مصطفى جاد الكريم، بالإعدام شنقا على المتهم بعد أخذ رأي مفتي الجمهورية في إعدامه.
